Vrau biznesmenin në Vlorë pas konfiktit për një kalë, lihet në burg Eduart Xhezo

VLORË- Është lënë në burg nga Gjykata e Vlorës Eduart Xhezo, i cili vrau në zonën e plazhit në Vlorë biznesmenin Arben Beqirajn pas konfliktit për një kalë.

Xhezo u vu në pranga nga Policia e Vlorës, në bashkëpunim me forcat operacionale të Tiranës, të cilët prej disa kohësh e mbanin nën mbikëqyrje.

Prej muajit gusht, ai fshihej në zonën e plazhit në Durrës, ndërsa përdorte edhe dy identitetet të tjera, si Ermal Xhezo apo edhe Ermal Dema.

Në momentin që uniformat blu u vunë në ndjekje të tij për ta prangosur, Xhezo ishte nën efektin e drogës, e ndërsa teksa tentoi t'u largohej me makinën ku udhëtonte, por u neutralizua në kohë nga policia.

Pas kontrollit në mjet, policia gjeti edhe dy karta identiteti me dy emra të ndryshëm, që fillimisht u dyshua se njëra prej tyre ishte e falsifikuar, por që më pas rezultoi të ishin të një shokut të tij.

Eduart Xhelo akuzohet për vrasjen e Arben Beqirajt e ndodhur më 4 gusht të këtij viti në zonën e plazhit të vjetër në Vlorë, pas sherrit se kali në pronësi të Xhezos kishte kaluar para lokalit të viktimës, Beqirajt.

Eduart Xhezo nuk është një emër i panjohur për autoritetet shqiptare. Më herët, ai është dënuar me 9.4 vite burg për një tentativë vrasje të dyfishtë, e ndërsa në 25 janar të këtij viti ai u prangos së bashku me një tjetër person si të dyshuar për tentativë të trafikut të drogës, të një sasie prej rreth 1 ton kanabis drejt Italisë.

Arrestimi i tij u bë vetëm dy ditë pas operacionit të zhvilluar nga Guardia di Finanza dhe policia shqiptare në një zonë bregdetare mes Fierit e Vlorës, ndërsa mbetet e paqartë se si Xhezo është liruar nga qelia.

//Shqiptarja.com

TAG:
• Vlore
• gjykata e vlores