Një grua 80-vjeçare është vrarë në Prizren, ndërsa bashkëshorti i saj 81-vjeçar është arrestuar si autori i dyshuar i krimit. Sipas Policisë së Kosovës, ngjarja u raportua rreth orës 01:30 të mëngjesit të 26 gushtit në banesën e çiftit. Fillimisht u raportuar si vdekje aksidentale nga bashkëshorti i saj, por pas ekzaminimit të vendit të ngjarjes, policisw i lindi dyshimi për vrasje të rëndë. 

Dyshimet u pwrforcuan pas lwndimeve tw konstatuara nw pjesw tw ndryshme tw trupit tw viktimws.

Sipas autoriteteve, çifti nuk kishte raste të mëparshme të raportuara për dhunë në familje dhe në momentin e ngjarjes ndodheshin vetëm në banesë. Trupi i viktimës është dërguar në Institutin e Mjekësisë Ligjore në Prishtinë për autopsi, ndërsa i dyshuari është ndaluar për 48 orë me vendim të Prokurorit të Shtetit.

Ngjarja në Prizren vjen vetëm dy ditë pas një tjetër krimi që tronditi Kosovën. Më 24 gusht, një grua shtatzënë u vra në Malishevë dhe edhe në atë rast i dyshuari është bashkëshorti i saj, i cili ndodhet në gjendje kritike pasi pësoi plagë nga arma e zjarrit. Kështu, kjo është vrasja e dytë e një gruaje brenda një jave në Kosovë, ku autor i dyshuar është bashkëshorti.

Pas vrasjes në Prizren reagoi edhe Rrjeti i Grave të Kosovës, i cili theksoi se dhuna ndaj grave nuk është "çështje private" dhe as një varg "rastesh familjare", por një problem i rrënjosur në pabarazinë gjinore që kërkon përgjigje të fortë nga institucionet.

Edhe pas vrasjes së gruas shtatzënë në Malishevë, organizata kishte ngritur shqetësimin se raste të tilla po vënë në pikëpyetje efektivitetin e mekanizmave shtetërorë për mbrojtjen e viktimave të dhunës. Sipas saj, vrasjet e grave nuk janë raste të izoluara, por tregues të dështimeve në parandalimin dhe trajtimin e dhunës ndaj grave.

Pas ngjarjes në Malishevë, zëvendëskryeministrja dhe ministrja në detyrë e Drejtësisë, Donika Gërvalla, zhvilloi një takim me përfaqësues të Policisë, Prokurorisë, Gjykatës dhe Qendrës për Punë Sociale për të shqyrtuar funksionimin e mekanizmave institucionalë dhe masat që duhet të ndërmerren për parandalimin e rasteve të tilla.