Vritet polici në veri, KFOR: Policia e Kosovës përgjegjëse për të menaxhuar situatën! Të gatshëm të përgjigjemi nëse ka nevojë

KFOR-i ka njoftuar se është duke e monitoruar nga afër situatën në Banjskë të Mitrovicës së Veriut.

Përmes një njoftimi për media KFOR-i ka thënë se janë të pranishëm në këtë zonë dhe i gatshëm për t’iu përgjigjur situatës, nëse kërkohet.

KFOR-i ka deklaruar se Policia e Kosovës, si reaguese e parë, ka përgjegjësinë parësore për menaxhimin e incidentit në terren.

“KFOR-i vazhdon ta vëzhgojë prej afër situatën në Banjskë, dhe trupat e KFOR-it janë prezentë në këtë zonë, të gatshëm të reagojnë, nëse kërkohet. Komandanti i KFOR-ut është në kontakt direkt me të gjithë mekanizmat ndërkombëtarë, përfshirë Bashkimin Evropian, shefin e Shtabit të Përgjithshëm të ushtrisë së Serbisë dhe institucionet e Kosovës, dhe është duke punuar për ta gjetur një zgjidhje”, është thënë në deklaratë.

Misioni i KFOR-it i udhëhequr nga NATO ka thënë se e dënon ashpër sulmin kundër Policisë së Kosovës dhe dërgon ngushëllimet më të thella për familjen e policit të vrarë sot në orët e para të mëngjesit në Banjskë.

M.T/Shqiptarja.com