Wollfarth: Arsim fëmijëve për të
ndryshuar jetën e komunitetit Rom

TIRANE - Përpjekjet për përmirësimin e kushteve të jetesës së komunitetit Rom në Shqipëri duhet të kalojnë përmes arsimimit të fëmijëve. Ky është mendimi i ambasadorit të OSBE në Shqipëri, Eugen Wollfarth, i shprehur përmes një komunikate për shtyp në prag të 8 prillit, Ditës Ndërkombëtare të Romëve.

“Përmes shkollimit të mirë fëmijët Romë do të kenë mundësi më të mëdha për të hyrë në botën e të rriturve me shanse të barabarta në shoqëri. Arsimi do të shërbejë për t’i hapur rrugën qasjes më të mirë në punësim, si dhe angazhimit të plotë në jetën qytetare dhe atë politike”, tha Ambasadori Wollfarth.

Sipas tij, “ndjekja e shkollës nga ana e fëmijëve Romë së bashku me nxënësit e tjerë shqiptarë duhet të jetë në krye të një qëndrimi të integruar për të ndihmuar zhvillimin e komunitetit Rom. Përqindja e lartë e braktisjes së shkollës nga ana e fëmijëve Romë mbetet një shqetësim i madh për ne sepse ka të bëjë me mbrojtjen e të drejtave arsimore të Romëve”.

“Nevojitet zbatimi i plotë i Strategjisë Kombëtare për përmirësimin e kushteve të jetesës së minoritetit Rom, si dhe i angazhimeve të Shqipërisë në kuadrin e Dekadës së Romëve, ndërkohë që duhen zhvilluar më tej mekanizmat ekzistues, duke përfshirë këtu nismat qeveritare për pajisjen e fëmijëve Romë me libra falas,” shtoi ambasadori i OSBE.

“Njëkohësisht, prindërit Romë duhet të jenë plotësisht të vetëdijshëm për rëndësinë dhe vlerën e shkollimit. U takon prindërve që të zgjedhin në favor të shkollimit si e vetmja rrugë për të siguruar mundësi më të mira jetësore për të ardhmen për fëmijët e tyre,” përfundoi ambasadori.

(im/shqiptarja.com)

TAG:
• OSBE