Wollfarth: Bashkëpunim për
integrimin dhe zgjedhje të lira

POLIÇAN - Ambasadori i OSBE-së në Tiranë Eugen Wollfarth i ka bërë apel partive politike të bashkëpunojnë për integrimin e vendit. Nga qyteti i Poliçanit ku ka vizituar uzinën ushtarake, Wollfarth kërkoi nga palët të gjejnë konsensus për miratimin e tre ligjeve të kërkuara nga Bashkimi Europian për marrjen e statusit të vendit kandidat.

“Për 100 vitet e tjera do të doja të inkurajoja të ketë bashkëpunim më të madh, ku bëhet fjalë për arritjen e qëllimeve kombëtare. Mesa kuptoj përveç paqes një objektiv tjetër kombëtar shumë i rëndësishëm është dhe bashkimi me BE-në dhe kjo ka nevojë për një bashkpunim shumë të madh. Procesi i reformës është një punë e madhe që duhet bërë dhe ka nevojë për kontributin dhe për bashkpunimin e të gjithëve, pra ne këtë e quajmë bashkëpunim. Ky lloj bashkëpunimi duhet të vazhdojë dhe në vitin 2013 që është një vit zgjedhor. Procesi i zgjedhjeve të 2013 duhet të jetë i ndershëm dhe me standard europiane”, u shpreh Wollfarth.

Ambasadori i OSBE-së dhe Ambasadorja e Gjermanisë në Shqipëri Carola Muller-Holtkemper ishin mesditën e sotme në Kombinatin Mekanik të Poliçanit ku janë dhuruar disa pajisje të reja për linjat e demontimit, vizitë gjatë të cilët ata u shoqëruan nga zv/ministri i Mbrojtjes Ekrem Spahiu, shefi i Shtabit të Përgjjithshëm të FA, Gjeneral Xhemal Gjunkshi si dhe pushtetarë lokalë. Pasi, është zhvilluar ceremonia e dhënies së pajisjeve në repartin e demontimit është zhvilluar inspektimi i procesit të punës nga dy ambasadorët.

“Gjatë viteve të fundit Shqipëria ka bërë shumë progres dhe ajo këshillë që mund t’i jepja unë është të vazhdoni kështu, të vazhdoni ketë proces. Edhe për politikanët shqiptar pikërisht këtë mesazh do të jepja, që të përmbushen ato kritere dhe të vazhdojnë përpara në rrugën drejt integrimit”, u shpreh Carola Muller-Holtkemper.

(eç/shqiptarja.com)

TAG:
• OSBE