Wollfarth i OSBE, fundjavë në
Sarandë në bordin e një jahti

SARANDE - Ambasadori i OSBE në Shqipëri duket i "dashuruar" me vendin e shqiponjave, aq sa edhe pushimet preferon ti bëjë në tokën shqiptare. Dhe jo dosido. Paparaci ynë e fotografoi ambasadorin e OSBE Eugen Wllfarth, në bordin e një jahti privat duke pritur ose daljen në det të hapur, ose qëndrimin aty për të mos u ekspozuar shumë në rrezet e diellit.

Sido që të jetë, dihet se ambasadorit të OSBE i pëlqejnë shumë aktivitetet ndryshe nga politika në Shqipëri. E ka shprehur edhe vetë që ka dëshirë të shikojë dhe të vizitojë vende të ndryshme, e për më tepër të provojë edhe prodhimet shqiptare. E këtë radhë, ka vendosur ndryshe. Ka vendosur të ekspozohet edhe publikisht në një jaht ankoruar në brigjet e Sarandës.

Sigurisht që ambasadori i OSBE e di se në Shqipëri ekziston moratoriumi për skafet e jahtet. Pjesa më e madhe e atyre që i përdorin jahtet i kanë në emër të shtetasve të huaj, madje edhe me flamuj të huaj se shqiptarëve nuk u lejohen. Megjithatë, duke e pranuar këtë procedurë që është diskriminuese për turizmin, ndoshta edhe ambasadori i OSBE do të ndërgjegjësohet që të ketë edhe ndryshim të legjislacionit në këtë fushë, një nismë që është ndërmarrë edhe nga Partia Socialiste por që nuk ka rezultuar e suksesshme.


(Në rreth ambasadori i OSBE Eugen Wollfarth)

E rëndësishme tani për tani është që ambasadori i OSBE, si gjithë politikanët shqiptarë, është duke shijuar pushimet, edhe pse ditën e djeshme në Sarandë ka pasur shumë ankesa për mungesën e energjisë elektrike. Një pjesë e madhe e pushuesve shqiptarë, janë drejtuar drejt vendeve të tjera, për shkak të mungesës së infrastrukturës.

Në shtator priten zhvillime të vrullshme politike dhe të gjitha palët, përfshi edhe trupin diplomatik, kanë vendosur të çlodhen gjatë gushtit për të pasur energjitë e duhura në shtator. Gjatë atij muaji do të diskutohet edhe për çështjen e imunitetit, për çështjen e kërkuar nga opozita për reformën në drejtësi, por edhe për çështjen e reformës parlamentare dhe të tjera zhvillime për zgjedhjet.

(gm/Shqiptarja.com)

(Shkrimi u botua në numrin e sotëm të gazetës Shqiptarja.com)

TAG:
• OSBE