Wollfarth: Jeni vend
sovran, e keni vetë fajin

Kreu i Prezencës së OSBE në Tiranë ka reaguar në mënyrë të menjëherëshme ndaj kritikave të shoqërisë civile. "Do të doja të komentoja sa i përket çështjes nëse ne duhet të jemi më shumë të pranishëm gjatë një procesi që duhet të jetë sovran, në një vend sovran. Në kontekstin e reformës së Kodit ose të reformës zgjedhore, teknika e përdorur nga OSBE/ODIHR-i është të ofrojë këshillë në bazë të rezultateve të vëzhgimit gjatë zgjedhjeve dhe, më pas, në bazë të përfundimeve dhe rekomandimeve", deklaroi Uollfarth. Për të cilin, e rëndësishme në një vend sovran është që kjo të bëhet nga përfaqësuesit e tij, duke përfshirë edhe diskutimet publike. "S'janë të huajt që duhet të drejtojnë një vend të pavarur, janë qytetarët e këtij vendi që e drejtojnë këtë vend. Askush nga ODIHR-i nuk do të vijë këtu për të dhënë udhëzime apo për të imponuar zgjidhje. Kjo është thjesht një ofertë. Ai që vendos është parlamenti. Por, edhe jashtë parlamentit, është e rëndësishme që kjo të ndiqet nga partitë politike, nga drejtuesit e tyre, nga shoqëria civile dhe nga media, në mënyrë që të ketë diskutim dhe presion për të ecur përpara, për të pasur drafte të mira dhe një përfundim të mirë", tha ambasadori. I cili ka nënvizuar se ky proces shoqërohet nga OSBE/ODIHR, por ndryshimi qëndron në faktin që shoqërohet, nuk drejtohet nga OSBE/ODIHR. "Ky është ndryshim shumë i rëndësishëm: duhet të jetë gjithmonë një proces shqiptar, i drejtuar nga shqiptarët. Dua t'ju kujtoj që Shqipëria është një vend sovran që duhet respektuar, por kjo sjell dhe përgjegjësi. Fajësimi i atyre që janë jashtë Shqipërisë për diçka që duhet të vendoset këtu, nuk është mënyra e duhur. Është mënyra e gabuar, jo e drejtë dhe një shfajësim i papranueshëm për mosveprimin", thotë Uollfarth. Për të, ndihma që vjen nga OSBE/ODIHR e nga institucione të tjera si, Këshilli i Evropës, është aty dhe ajo është një këshillë, jo një urdhër. "Është një ofertë për këshillë që duhet respektuar e zbatuar këtu. E nëse ky zbatim s'ndodh, fajësoni shqiptarët, mos fajësoni ndërkombëtarët", thotë ambasadori.

TAG:
• OSBE