Atentati në Lezhë/ Shënjestër dyshohet i afërmi i Ardian Nikulajt! Mbeti i plagosur bashkë me pronarin e berberhanes, 7 autorë (VIDEO)

Detaje të reja janë zbardhur në lidhje me atentatin me armë zjarri të ndodhur mbrëmjen e së dielës në fshatin Rrilë të Lezhës, ku mbeti i plagosur një 30-vjeçar, pronari i berberhanes, Sokol Daci. Ngjarja ndodhi rreth orës 21:00 dhe sipas burimeve janë përdorur dy armë zjarri, ndërsa nga të shtënat dyshohet se ka mbetur i plagosur në këmbë edhe një person tjetër, Merando Nikulaj, i cili e ka djalë xhaxhai Ardian Nikulajn dhe mendohet të ketë qenë shënjestra e sulmit me armë.

Nikulaj gjendej brenda berberhanes dhe në atë moment ishte duke u qethur. Pas ngjarjes, është larguar dhe nuk është paraqitur në spital, ndërsa policia po ushtron kontrolle në spitale dhe klinika private, ku dyshohet se ai mund të ketë shkuar për mjekim.

3 vite më parë, biznesmeni Ardian Nikulaj mbeti i vrarë në lokalin e tij në Shëngjin.

Ndërkohë, nga tërësia e veprimeve hetimore të deritanishme rezulton se autorët kanë qenë 7 persona. Ata kanë ardhur me dy automjete, njëri prej tyre tip “Audi”.  2 prej autorëve kanë qëlluar me breshëri plumbash në drejtim të berberhanes, brenda së cilës ndodheshin katër persona.

Nga veprimet e kryera rezulton se në momentin e atentatit ka qenë rastësisht edhe një efektiv policie, i cili ka deklaruar se ka qëlluar për të neutralizuar autoret, por pa arritur t’i identifikojë ata. Nga të shtënat, 4 plumba kanë prekur dhe dy biznese të tjera përballë berberhanes, por fatmirësisht personat që ndodheshin brenda kanë shpetuar mrekullisht.

Për zbardhjen e ngjarjes, policia po kryen një sërë veprimesh hetimore, ku janë shoqëruar dhe po merren në pyetje disa persona. Po ashtu, po analizohen kamerat e banesave dhe bizneseve në zonë, për të parë lëvizjet e automjetit të autorëve para dhe pas ngjarjes, teksa në cilësinë e provës materiale janë sekuestruar rreth 40 gëzhoja automatiku dhe pistoletë.

30-vjeçari Sokol Daci vijon të jetë në gjendje të rëndë shëndetësore në spitalin e Traumës në shërbimin e reanimacionit, i intubuar. Parametrat jetësorë janë stabël. Sipas burimeve brenda spitalit, 30-vjeçari dyshohet se ka marrë 5 plumba në pjesë të ndryshme të trupit. Të njëjtat burime thonë për Report Tv, se ka 2 plumba në shpatull (kraharor), 2 në bark dhe 1 në këmbë. Ai ushtronte profesionin e berberit prej vitesh dhe nuk njihej si person problematik apo me precedentë të mëparshëm penalë.

Ngjarja rikthen në vëmendje historinë e hakmarrjes mes fiseve Nikulaj dhe Lekstakaj.

Si nisi saga e hasmërisë mes fiseve Nikulaj dhe Lekstakaj

Hasmëria mes fisit Palaj (Lektasaj) dhe Nikulaj e ka zanafillën në vitin 1996 ku anëtarë të familjes Palaj (Lektasaj) kanë ekzekutuar vëllain e Ardian Nikulajt, pas një konflikti të çastit në një pikë karburanti për 1000 lekë karburant. Vëllai i Ardian Nikulajt bashkë me një person tjetër ishin shitës në karburantin në fjalë dhe një nga pjesëtarët e familjes Lekstakaj po furnizonte makinën. Pas furnizimit me karburant shitësit kanë debatuar me drejtuesin e mjetit me pretendimin se nuk kishte bërë pagesën prej 10 mijë lekësh të vjetra të furnizimit me karburant.

Pas debatit verbal drejtuesi i mjetit është larguar, duke u rikthyer i armatosur disa minuta më vonë dhe ka qëlluar në drejtim të dy punonjësve duke i lënë të vdekur në vend mes të cileve dhe vëllain e Ardian Nikulaj. Aty nis dhe historia e gjakmarrjes, ku pak muaj më vonë vriten Gëzim Lekstakaj dhe Laurent Gjetja që ishte nip i familjes. Ndërsa në vitin 1999 vritet Gjovalin Lekstakaj dhe plagoset rëndë Pjetër Lekstakaj. Sot e kësaj dite kjo ngjarje e rëndë e ndodhur disa vite më parë është e pazbardhur dhe s’ka asnjë autor të dënuar nga drejtësia. 

Ka qenë kjo histori që ka sjellë disa vrasje mes dy fiseve, ku vrasja e Ardian Nikulajt në 19 prill të 2023 u pasua me vrasjen e Nikolin Lekstakajt, tre muaj më pas, më 19 korrik. Për Nikulajn u zbulua se vrasja u realizua nga të huajt për 1.7 milionë paund, shumë e ofruar edhe për kokën e vëllait të tij.

Pas gati 7 muajsh nga vrasja e Ardian Nikulajt, u ekzekutua edhe i afërmi i tij, Entjan Nikulaj.

Rendit zhvillimet sipas orarit:

Të Fundit Të Parat