Dita e hënë shënon fundin e afatit të mazhorancës që demokratët t’i japin fund bojkotit të tyre disa javor dhe të rikthehen në Komisionin për Reformën Territorale.

Mungesa e PD do të sjellë prishjen e konsensusit dhe PS do të marrë shumicën e anëtarëve dhe drejtimin e komisionit, duke e lënë pa të drejtë vote partinë kundërshtare.

Gjasat janë që demokratët të mos paraqiten sot në Komisionin pasi më 30 janar Berisha konfirmoi vijimin e bojkotit duke thënë se nuk do të bashkëpunojë me PS-në për sa kohë bllokon drejtësinë për çështjen “Balluku”.

Kuvendi futi në rendin e ditës në seancën e së martës ndryshimin e përbërjes së Komisionit për Reformën Territoriale, ku opozitës i hiqet barazia e numrave dhe bashkëkryesimi.

Në të njëjtën orë me mbledhjen e Komisionit, grupi parlamentar i PD do të mblidhet në seli për të diskutuar qëndrimin që do të mbajë në seancën plenare të së martës.