Zbuten "rebelët", Doshi e Ndreu: 
Do të votojmë "Policinë e Shtetit" 

TIRANE - Ndryshojnë qëndim dy nga pesë deputetët e mazhorancës të konsideruar “rebelë”, për shkak të kritikave që kanë dhënë në komisionet parlamentare ndaj projektligjit të Policisë së Shtetit, ndërsa munguan edhe në seancën e shkuar parlamentare ku do të votohej pr/ligji për Këshillin e Lartë të Drejtësisë, që kërkonte 84 vota. Deputetët socialistë Tom Doshi dhe Pjerin Ndreu kanë hedhur poshtë të gjitha aludimet, duke pohuar se jo vetëm që do të marrin pjesë në seancën e fundit plenare, por do të votojnë të gjitha projektligjet e mazhorancës, ku mes të cilave përfshihen reforma territoriale, KLD-ja dhe Policia e Shtetit. 

Tom Doshi: Do t'i votoj të gjitha pr/ligjet e mazhorances, zëri im kritik u dëgjua në Komisione
Deputeti socialist Tom Doshi, edhe pse sot nuk ishte i pranishëm në fillim të mbledhjes të Komisionit të Ligjeve ku u diskutua dhe miratua projektligji për Policinë e Shtetit, tha se do të bëhet pjesë e seancës parlamentare të së enjtes dhe do të votojë projektligjet e qeverisë.

Deputeti i mazhorancës tha se zëri i tij kritik është marrë parasysh dhe është pasqyruar me ndryshime në projektligj.

“Do të jem në seancën e së enjtes dhe do të votoj pro. I bëj thirrje dhe opozitës të marrë pjesë për të votuar për të gjitha ligjet e rëndësishme, sic janë reforma terrotiriale dhe pr/ligji i KLD-së. Të gjitha ligjet e mazhorancës do t’i votoj, ato pakënaqësi që kisha i shfaqa në komision dhe janë rregulluar”, - u shpreh deputeti i mazhorancës për gazetarët, pas mbledhjes së Komisionit të Ligjeve.

Pjerin Ndreu: Të enjten në Parlament, do të votoj projektligjet e rëndësishme
Sakaq, edhe deputeti tjetër socialist Pjerin Ndreu, i cili gjithashtu ka pasur rezerva në lidhje me projektligjin për Policinë e Shtetit tha se do të marrë pjesë në parlament për të votuar projektligjet e rëndësisshme që pritet të diskutohen më 31 Korrik.

Doshi, Ndreu, Prenga, Frroku, Cara "rebelët" që munguan në seancën e shkuar plenare..."shtynë" KLD-në
Deputeti i Partisë Socialiste prej 3 mandatesh, Tom Doshi si dhe deputetët e tjerë socialist Armando Prenga, Mark Frroku, Pjerin Ndreu dhe Parid Cara si dhe deputeti i PBDNJ-së Vangjel Dule (i cili ndodhej në Athinë ku takoi ministrin e Jashtëm grek, Evangelos Venizellos) nuk ishin të pranishëm në seancën e shkuar parlamentare, çka çoi në shtyrjen e projektligjit të Këshillit të Lartë të Drejtësisë, pasi kërkonte miratim me 84 vota. Mungesa e tyre në këtë seancë u argumentua me faktin se morën pjesë në ditëlindjen e Mark Frrokut.

Seanca e së enjtes, mbyll këtë sesion parlamentar, miratohet reforma territoriale, KLD, e Kodi Doganor
Seanca e kësaj jave në Kuvend, që është dhe e fundit për këtë sesion, pritet të miratojë disa çështje të rëndësishme që kërkojnë shumicë të cilësuar, mes tyre reformën e re terrioriale të vendit, por dhe ndryshimet në ligjin për KLD-në, apo kodin doganor.

Sot në Komisionin e Ligjeve, Doshi, Marku e Prenga, nuk morën pjesë në votimin e pr/ligjit të Policisë së Shtetit
Ligji për Policinë e Shtetit u votua në tërësi në Komisionin e Ligjeve vetëm me votat e mazhorancës. I vetmi deputet i opozitës që merr pjesë në komision, Nard Ndoka i Partisë Demokrtistiane votoi kundër, ndërsa gjatë votimit munguan në sallë deputetët e majtë Tom Doshi, Armando Prenga dhe Mark Frroku. 

Gjatë mbledhjes së Komisionit të Ligjeve u votua kërkesa e ILDKPKI për strukturën e re, në bazë të së cilës shtohet numri i punonjësve të Inspektoriatin e Deklarimit të pasurive. Po kështu u votua edhe vendimi i qeverisë për marrëveshjen e arritur me kompaninë çekë të energjisë CEZ-Group.

Redaksia Online
(Gre.M/Shqiptarja.com) 

/Shqiptarja.com