Zela: Suksesi në Vjenë, mjeshtrit
shqiptarë frymëzuan pikturën time

Të jetosh me artin në Vjenë, në një nga vendet më të zhvilluara të Europës është një sfidë për artistin shqiptar Bujar Zela. I kthyer në atdhe pas 25 vjetësh mërgim me ekspozitën e tij në Muzeun Historik Kombëtar, Bujar Zela nuk i ka harruar mjeshtrit shqiptar ku u brumos arti i tij dhe artistët më të mirë të fushave të tjera.

“Unë jam bazuar gjithmonë në traditat shqiptare si Vangjush Mio, Koli Ndromeno, këta janë frymëzuesit e mi. Fatmir haxhiu, Brdhyl Dule, Dhurata Celi, Mustafa Roti, Sali Shijaku. Këto janë piktorët që i kanë dhënë artit shqiptar” tha Bujar Zela.

Në këto peisazhe dhe portrete në dukje modeste, punuar në stilin tradicional të pikturës, janë efektet, emocionet dhe ngjyrat që i japin origjinalitet veprës.

“Pika kryesorja e imja, siç e kam titulluar dhe ekspozitën është ‘Ndjenja e ngjyra” dhe efekti i krijimtarisë time është efekti i ngjyrave. Duket qartë dhe bie në sy e kuqja, ajo sjell shpresë, që tregon të ardhmen. Kam paraqitur Sandër Prosin, Kadri Roshin, që janë ikonat e krijimtarisë shqiptare” shtoi ai 

Pasyqrimi tematik i traditave kulturore të vendit të tij dhe Austrisë e bëjnë pikturën e Bujar Zelës të pëlqyeshme nga publiku mbarëkombëtar.

“Arti me jetën timë është i lidhur ngushtë. Arti për mua është jeta, si çdo njeri që nuk jeton pa frymë, unë nuk jetoj dot pa art. Ama që të jetosh me artin është një rrugë e mendueshme, duhet shumë punë, shumë luftë e shumë iniciativë për të ecur aty dhe shkallët e larta që kërkon të arrish” ka përfunduar artisti.



(Piktori shqiptar Bujar Zela)



Redaksia Online
(F.T/shqiptarja.com)