Zelensky në samitin e Komunitetit Politik Evropian, frikë për armatimet dhe ndihmën për luftën! BE premton një paketë të re

GRANADA - Të gjithë janë duke buzëqeshur nën diellin e Granadës, përveç njërit: presidentit ukrainas Volodymyr Zelensky. Kur ai mbërriti dje në mëngjes në Palazzo dei Congressi, ku u mbajt takimi i tretë i Komunitetit Politik Evropian, me 48 krerë shtetesh dhe qeverish të vendeve evropiane (jo vetëm 27 të BE-së), Rusia ende nuk e kishte sulmuar fshatin e Hrozës, afër Kupiansk. Por, presidenti ukrainas tashmë kishte një fytyrë të tensionuar dhe fjalët e tij zbuluan një vështirësi që nuk i është dashur të përballet në të kaluarën: lodhjen e aleatëve ndaj luftës së nisur nga Rusia.

 “Shpresa jonë , angazhimi ynë këtu është ta mbajmë Evropën të bashkuar”, tha ai me të hyrë në samit.

Dhe në fjalimin e tij para liderëve Zelensky shprehu shqetësimin për të parë se "Evropa po ndjek stuhinë politike në rritje në Amerikë", ku për të shmangur paralizën administrative Kongresi miratoi një buxhet pa fonde për Kievin.

LEXO EDHE:
Putin: Biden propozoi shtyrjen e pranimit të Ukrainës në NATO në 2021

“Evropa nuk duhet të presë që stuhia të përfundojë, por të jetë së bashku me Amerikën për të mbrojtur vlerat dhe lirinë tonë të përbashkët”, tha Zelensky.

Dita ishte një listë e takimeve dypalëshe në të cilat presidenti ukrainas mori rikonfirmimin e mbështetjes nga Bashkimi Evropian.

“Nuk kemi të drejtë të jemi të lodhur”, tha presidenti francez Emmanuel Macron në konferencën për shtyp.

Në takimin kokë më kokë me Zelensky, ai konfirmoi bashkëpunimin dypalësh në sektorin e mbrojtjes dhe vazhdimin e punës për zgjerimin e aftësive të sistemit të mbrojtjes ajrore të Ukrainës.

Kancelari gjerman Olaf Scholz premtoi një sistem të ri të mbrojtjes ajrore. Dhe nga kryeministri spanjoll Pedro Sánchez  ai mori një angazhim për të furnizuar lëshuesit e raketave Hawk dhe më shumë gjeneratorë të energjisë. Zelensky diskutoi me kryeministren italiane Giorgia Meloni për paketën e ardhshme të ndihmës ushtarake të Italisë, duke përfshirë mënyrat për të forcuar mbrojtjen ajrore të Ukrainës.

Udhëheqësi i Kievit pati gjithashtu një takim kokë më kokë me kryeministrin armen, Nikol Pashinyan për herë të parë, pas operacionit ushtarak të Azerbajxhanit në Nagorno Karabakh që çoi në eksodin e armenëve. BE-ja po përpiqet të ndërmjetësojë midis Armenisë dhe Azerbajxhanit, por presidenti i Azerbajxhanit Aliyev vendosi të mos marrë pjesë në samitin e Granadës dje, siç bëri presidenti turk Erdogan.

Presidenti i Këshillit Evropian Charles Michel tha se BE-ja po "përgatiste një paketë të re shtesë të rëndësishme ndihme" .

Megjithatë, Unioni po shfaq të çara, duke filluar me Poloninë, e cila njoftoi pak ditë më parë se nuk do t'i japë më ndihmë ushtarake Kievit (por është në një fushatë zgjedhore). Dhe dje Viktor Orbán shkroi në X se “Brukseli po krijon një botë Orwelliane para syve tanë. Ata blejnë dhe furnizojnë armë përmes Fondit Evropian të Paqes. Ata duan të kontrollojnë median përmes Aktit për Lirinë e Medias. Ne nuk i luftuam komunistët që të përfundonin në 1984."

Ndjeshmëritë e ndryshme do të shfaqen gjithashtu sot, kur liderët e BE-së diskutojnë për zgjerimin, ashtu siç u shfaqën në rishikimin e buxhetit shumëvjeçar me Orbanin, i cili pengoi 50 miliardë për Kievin./Corriere della Sera, përshtati në shqip Shqiptarja.com

TAG:
• Volodymyr Zelensky
• lufta ne ukraine

Sondazhi i ditës:

Si ka qene per ju viti 2024?

• I mire

  43.8%

• I keq

  22.8%

• As i mire as i keq

  33.4%

Vota total: 1518

Votat totale janë unike

• Sondazhi i ditës:

  Si ka qene per ju viti 2024?

  I mire I keq As i mire as i keq