Presidenti ukrainas, Volodymyr Zelensky ka konfirmuar se raundi i dytë i bisedimeve trepalëshe midis Ukrainës, SHBA-së dhe Rusisë do të zhvillohen të mërkurën në Abu Dhabi. Bisedime do të mbahen edhe ditën e enjte.

"Tashmë ekziston një marrëveshje për një takim, një takim trepalësh në nivelin e duhur. Ky takim do të zhvillohet siç është planifikuar, të mërkurën dhe të enjten në Emirates, ashtu si herën e fundit”, deklaroi Zelensky.

Dy ditë më parë, i dërguari special i Shteteve të Bashkuara, Steve Witkoff, tha se zhvilloi takime produktive dhe konstruktive me të dërguarin special rus, Kirill Dmitriev, në Miami, ndërsa administrata e Presidentit Donald Trump po bën presion për t'i dhënë fund luftës gati katërvjeçare të Rusisë në Ukrainë.

Raundi i parë i negociatave trepalëshe u zhvillua në 23-24 janar, por nuk pati shumë përparim në çështjen e territorit. Moska dhe Kievi thanë se ishin të hapura për dialog të mëtejshëm.

Udhëheqësi ukrainas ka pranuar dallimet themelore midis qëndrimeve ukrainase dhe ruse, duke riafirmuar çështjet territoriale si një pikë të rëndësishme mosmarrëveshjeje.

Kremlini këmbëngul që për të arritur një marrëveshje paqeje, Kievi duhet të tërheqë trupat e tij nga zonat në lindje që Rusia i aneksoi në mënyrë të paligjshme, por që nuk i ka pushtuar plotësisht.

Ndërkaq, Presidenti i SHBA-së, Donald Trump më 29 janar njoftoi se i kishte kërkuar Presidentit rus, Vladimir Putin të ndalonte bombardimin e qyteteve ukrainase për një javë. Moska tha të nesërmen se armëpushimi vlen vetëm për Kievin dhe do të zgjaste deri më 1 shkurt.

Në ditët e fundit, Rusia ka vazhduar sulmet e saj ndaj infrastrukturës civile në qytete të tjera ukrainase.
 

 

Rendit zhvillimet sipas orarit:
Ora 21:54
Zelensky takohet me negociatorët përpara takimit trepalësh Ukrainë-Rusi-SHBA: Gati për të ndërmarrë hapa konkretë

Foto: Volodymyr Zelensky

Presidenti ukrainas Volodymyr Zelensky u takua me ekipin e negociatorëve që do të marrin pjesë në bisedimet trepalëshe me të dërguarit rusë dhe amerikanë në Abu Dhabi duke filluar nga e mërkura: Rustem Umerov, Kyrylo Budanov, Sergiy Kyslytsya, Andrii Hnatov dhe Oleksandr Bevz.

 Përmes një postimi në X, Zelensky shpjegoi se kishte "miratuar kornizën për bisedimet dhe kishte përcaktuar detyra specifike", duke shtuar se "delegacioni ukrainas do të zhvillojë gjithashtu takime dypalëshe me palën amerikane".

Zelensky shtoi se "Ukraina është gati të ndërmarrë hapa konkretë”.

“Ne besojmë se është realiste të arrihet një paqe dinjitoze dhe e qëndrueshme. Ne e konsiderojmë dokumentin mbi garancitë dypalëshe të sigurisë me Shtetet e Bashkuara si të plotë dhe parashikojmë punë të mëtejshme thelbësore mbi dokumentet që lidhen me rimëkëmbjen dhe zhvillimin ekonomik”, tha ai.

Zelensky shtoi se pret që "pala amerikane të vazhdojë të jetë vendimtare në sigurimin e kushteve të nevojshme për dialog".

Për më tepër, theksoi ai, "masat e deeskalimit që hynë në fuqi të enjten e kaluar në mbrëmje po ndihmojnë në forcimin e besimit të publikut në procesin e negociatave dhe rezultatin e tij të mundshëm. Lufta duhet të përfundojë. Faleminderit të gjithëve në mbarë botën që po ndihmojnë. Lavdi Ukrainës!"

Xh.K/Shqiptarja.com