Është një udhëtim muzikor i frymëzuar nga pafundësia e universit dhe që sjell një mikrokozmos zanor që të surprizon e të fton për reflektim.
Bëhet fjalë për koncertin “Entering Zero Gravity” nga katër artistë vjenezë të ansamblit muzikor “Alpha Trianguli”, që çeli mbrëmjen e kësaj të mërkure edicionin e 10-të të Festivalit Ndërkombëtar të Tunxhit, “International Albanian Brass Festival”.
“Katër artistët austriakë kanë regjistruar pamje hapësinore nëpërmjet teleskopëve të tyre dhe i kanë përkthyer ato në muzikë. Ky është edicioni i 10-të i Albanian Brass Festival, një edicion i ardhur pas shumë vitesh mundim, lodhjesh, eksperiencash shumë të mira, kënaqësi shumë të mëdhaja. Kanë qenë mbi 150 artistë të ftuar në shumë koncerte, të ardhur nga Australia, Meksika, Amerika, Rusia, Austria, Italia dhe vende të ndryshme. Është kënaqësi shumë e madhe për ne si organizatorë të arrijmë këtë dekadë, të festojmë këtë dhjetëvjetor dhe të kontribuojmë për jetën kulturore në vend dhe për artistët e rinj, duke mbajtur uorkshope por edhe koncerte falas për gjithë artdashësit.”, - thotë Ilir Kodhima, drejtues artistik i festivalit.
“International Albanian Brass Festival” organizohet nga Shoqata “Artistë Interpretë” në Tiranë. Përveç koncerteve në mbrëmje, gjatë ditëve mbahen edhe masterclasse mbi muzikën klasike, moderne apo xhaz. Festivali Ndërkombëtar me instrumentet e tunxhit synon të sjellë më tepër vëmendje në traditën dhe vlerat muzikore që sjellin këto instrumente.
Komente
