Komisioni Qendror i Zgjedhjeve ka publikuar fletën e votimit dhe renditjen e kandidatëve për Kryetar Bashkie në bashkitë Vlorë, Berat, Cërrik, Mat, Tepelenë. Zgjedhjet e pjesshme do të mbahen më 9 Nëntor.

Beteja në Vlorë është mes 3 rivalëve: kandidates së PS Bruna Mersinit,  të pavarurit të mbështetur nga opozita Dionis Sota, i cili ka një profil në sipërmarrjen turistike dhe Gjergj Nikës demokratit i cili fitoi në Kolegj Zgjedhor të drejtën për garuar si kandidat i pavarur, pasi KQZ dhe KAS e përjashtuan nga gara.

Në Tepelenë ish kreu i Gardës Gramoz Sakos është përballë kandidatit të pavarur të mbështetur nga Partia Demokratike Gabriel Gumës.

Në Berat, nënkryetari Ervin Ceca që drejton bashkinë prej ditës që Ervin Demo u dorëhoq për t’u bërë deputet, garon nën logon e socialistëve për tu zgjedhur kryetar. Përballë ka biznesmenin Pavlo Shkarpa, i cili garon si pavarur dhe mbështetet nga korpusi opozitar.

Florenc Doka i PS, aktualisht kryetar i komanduar i Cërrikut garon përballë dy emrave nga opozita. Mjeku Amarildo Hoxha garon i pavarur dhe mbështetet nga PD, ndërsa kriminologu i kthyer nga Italia, Eligert Hima garon nën logon e Shqipëria Bëhet.

Në Mat demokratët mbështesin si kandidat të pavarur avokatin Eduart Brahilika, ndërsa socialistët në këtë bashki, janë të ndarë.  Kandidati zyrtar i tyre është Altin Bojni, i cili drejton aktualisht bashkinë, ndërsa Suzana Pasha, që drejtonte forumin e gruas socialiste në Mat, e zemëruar me partinë, kandidon si e pavarur.

Renditja për zgjedhjet e datës 9 nëntor 2025
Bashkia Vlorë:
1. Brunilda Mersini
2. Dionis Sota
3. Gjergj  Nika
Bashkia Berat
1. Ervin Ceca
2. Pavlo Shkarpa
Bashkia Tepelenë
1. Gabriel Guma
2. Gramos Sako
Bashkia Cërrik
1. Eligert Hima
2. Amarildo Hoxha
3. Florenc Doka
Bashkia Mat
1. Altin Bojni
2. Eduart Brahilika
3. Suzana Pasha