Shpresa e Partisë Demokratike për të shpallur të pavlefshëm 11 majin dhe për t’u rikthyer në kutitë e votimit duke përsëritur zgjedhjet, u shua edhe në dyert e Kolegjit Zgjedhor. Të paktën për 4 qarqet e para, që Kolegji Zgjedhor shqyrtoi këtë të mërkurë, duke vendosur rrëzimin e ankimimeve të PD për Lezhën, Kukësin, Gjirokastrën dhe Korçën.

Trupa gjykuese nuk u bind nga argumentet e demokratëve se zgjedhjet ishin të parregullta, në to u përdor administrata zgjedhore, shitblerja e votës apo se u manipulua votimi nga jashtë.

Në ndihmë, PD-së nuk erdhi dot as argumenti i përfaqësuesit të saj Marash Logut, që nuk harroi të përmende betejën me anëtarin e KAS- Ilir Rusmajlin që sipas tij ka cenuar paanshmërinë e gjykimit të ankesave të opozitës në Komisionin e Ankimeve dhe Sanksioneve.

"Prania e Ilir Rusmajlit në KAS cenoi parimin e paanshmërisë, ne kemi kërkuar përjashtimin e këtij anëtari. Vetë ky anëtar ka shkruar vendimmarrjen për përjashtimin e tij. Ai as nuk duhet të ishte i pranishëm, as të merrte vendim, as të shkruante vendimin për kërkesën tonë për përjashtimin e tij”, tha Logu. 

KAS më herët rrëzoi të gjitha kërkesat e PD-së për shpalljen të pavlefshme dhe përsëritjen e zgjedhjeve për të 12 qarqet e vendit. Kolegji është hallka e fundit ku ankimohet rezultati.

Rendit zhvillimet sipas orarit:
Ora 12:16
Seanca në Kolegjin Zgjedhor/ KQZ pyet PD: A është ndaluar ndonjë person të votojë?! Rusmali s’ka konflikt interesi! Logu: DHL shkeli kontratën

Përfaqësuesi i PD, Marash Logu, gjatë një seance në KAS

Teksa po mbahej seanca e ankimimit të PD-së për Lezhën, Kolegji Zgjedhor dhe KQZ i kanë drejtuar disa pyetje përfaqësuesit ligjor të demokratëve, Marash Logu.

KQZ rrëzoi pretendimet e opozitës, duke nënvizuar se procesi ishte i rregullt, nuk u ndalua asnjë qytetar që të votonte, nuk u gjetën shkelje serioze, teksa edhe përfaqësimi i anëtarit të KAS Ilir Rusmali është ligjor dhe jo në konflikt interesi.

Disa prej pyetjeve drejtuar PD ishin:

-Cila ishte shkelja konkrete e bërë nga kontrata me DHL nga KQZ.

-Cilat ishin shkeljet dhe rastet konkrete që keni denoncuar në KQZ për përdorim të administratës zgjedhore? 

-Forma konkrete dhe prova esenciale ku bazon kërkesën për pavlefshmëri të zgjedhjeve?

-Në cilën pikë dhe cilën faqe të raportit të OSBE-ODIHR, shprehet me ndonjë problematikë në ndonjë qendër votimi?

Përfaqësuesi ligjor i opozitës u shpreh se:

“DHL shkeli kontratën duke bërë nënkontraktimin, ka të bëjë me faktin që operatorët e tjerë postarë as nuk i njohim as nuk i dimë dhe nuk dimë çfarë garancie na jep. Operatorët e tjerë postarë të vendosur aty pa miratimin e KQZ dhe palëve politike, cenojnë integritetin e zgjedhjeve.

Nëse ka nevojë t’ju lexoj raportin e ODIHR e bëj me kënaqësi, por kanë konstatuar në faqen 4 parregullsi”.

Kurse përfaqësuesja e KQZ në seancë nënvizoi se denoncimet janë bërë nëpër rrjete sociale.

“Pala ka paraqitur denoncime nga Facebook”, theksoi zyrtarja e KQZ.

Kurse për përjashtimin e anëtarit të KAZ, përfaqësuesja e KQZ theksoi se “nuk ka konflikt interesi mes punës së tij në institucion tjetër dhe në KAS”.

Gjithashtu KQZ e pyeti përfaqësuesin e PD-së nëse është konstatuar ndonjë rast ku ndonjë qytetar ishte ndaluar që të votonte, që mund të përbënte edhe një provë për parregullsi.

A.Q/Shqiptarja.com

A.Q/SI.E./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 5 Korrik, 08:25

    Nis aksioni për lirimin e hapësirave publike, si e vlerësoni?

Lajme të tjera