Zgjedhjet, priten ndryshime në Kodin Zgjedhor dhe ligjin e pushtetit vendo

TIRANË - Pesë muaj para mbajtjes së zgjedhjeve lokale të 21 qershorit, autoritetet shqiptare pritet të nisin punën për përmirësimin e legjislacionit zgjedhor. Krahas ndërhyrjeve të pritshme në Kod, priten ndryshime dhe në ligjin "Për organizimin dhe funksionimin e pushtetit vendor", nisur nga fakti se në zgjedhjet e ardhshme do të zbatohet ndarja e re territoriale me 61 njësi.
Mazhoranca tashmë i ka përgatitur draftet me ndërhyrjet në ligjet respektive, ndërsa pret që dhe opozita t'i bashkohet këtyre nismave ligjore, shqyrtimi i të cilave pritet të nisë me fillimin e sesionit të ri parlamentar, më 19 janar.
Ndryshimet në të dy ligjet janë kryesisht me karakter teknik, dhe synojnë përshtatjen e tyre me ndarjen e re. Ndërhyrjet në ligjin "Për organizimin dhe funksionimin e qeverisjes vendore", parashikojnë ndër të tjera një rritje të numrit të anëtarëve të këshillave në të 61 bashkitë, e bazuar kjo dhe në kriterin e numrit të popullsisë që ka çdo bashki.
Ndërkohë, ekspertë të pavarur zgjedhorë janë shprehur për domosdoshmërinë e përmirësimit të ligjit elektoral, ku nevojitet të reflektohen rekomandimet e OSBE/ODIHR, por dhe ndryshimet e krijuara me miratimin e hartës së re territoriale.
Në kuadër të procesit të ardhshëm zgjedhor pritet të marrë zgjidhje dhe përbërja e Komisionit Qendror të Zgjedhjeve, i cili prej tetë muajsh, vijon të funksionojë me katër anëtarë dhe ku mazhoranca nuk është e përfaqësuar. /ATSH/
 

TAG:
• OSBE