Një ditë para takimit Bardhi-Paloka, Berisha mbledh drejtuesit politik, Alibeaj grupin parlamentar

Paralel me mbledhjen që po zhvillonte Sali Berisha, Enkelejd Alibeaj ka mbledhur në kryesinë e Kuvendit grupin parlamentar. Mbledhja vjen një ditë para takimit Bardhi-Paloka, 2 negociatorët në procesin e bashkimit të PD për të dalë me 1 kandidat në zgjedhjet vendore të 2023. Report Tv me gazetaren Danjela Maloku ka zbardhur diskutimet, në fokus të së cilës ka qenë axhenda parlamentare si edhe për takimin e nesërm mes 2 negociatorëve. Bardhi deklaroi se nuk duhet të hyjnë në këtë proces me paragjykime, ndërsa për korrektesë u ka lexuar deputetëve edhe komunikimin që ka pasur me Palokën, që kishte të bënte me kohën se kur do të zhvilloheshin diskutimet.

Në selinë e PD-së, ku Berisha ka thirrur të deleguarit në qarqe për zgjedhjet vendore, Jozefina Topalli u pyet nga gazetarja e Report Tv Danjela Maloku në lidhje me negociatat mes Bardhit dhe Palokës për bashkimin e PD-së.

‘Është një fazë e mirë me të cilën mund të punohet. Politika është e komplikuar është me fat kur koherenca dhe bashkimi ecën bashkë. Duhet gjetur forca dhe mënyra për të ecur bashkë që të ndryshojmë situatën në Shqipëri. Kështu nuk ecet më!’- u shpreh Topalli.

Në Komisionin e Rithemelimit janë të gjithë të hapur për të mirëpritur grupin e Alibejat. Teksa hynin në mbledhjen që Berisha ka thirrur me drejtuesit e qarqeve, Edmond Spaho, Bardh Spahia dhe Luan Baçi i janë përgjigjur pyetjeve të gazetares së Report Tv, Danjela Maloku, në lidhje me negociatat për bashkim.

“Pa diskutim që situata ka një përmirësim të jashtëzakonshëm në krahasim me një vit përpara. Unë flas për Qarkun e Korçës, që e kam ndjekur nga afër. Strukturat janë plotësuar me të gjithë elementët. Tani jemi gati për primaret për zgjedhjet vendore.  Ne e dimë që në grupin parlamentar ka një ngërç, që është e domosdoshme të kapërcehet. Kapërcimi arrihet përmes bisedimeve. Uroj që të dalim me një kandidat të përbashkët në zgjedhjet vendore. Të gjithë deputetët që janë zgjedhur në emër të PD në prill 2021 janë përfshirë në grupet e punës”, tha Spaho.

“Ne kemi thënë vazhdimishjt që dyert e PD janë të hapur për ccdo demokrat që vendos t’i bashkohet shumicës”, tha Bardh Spahia i Shkodrës.

“Gjithmonë në negocim kemi qenë. Gjatë gjithë kohës bisedojmë me njëri-tjetrin që të jemi bashkë. Baza është e gjitha bashkë dhe duan që të bisedojnë, pvarësisht skepticizmit tim që e kam shprehur se nuk kam besim te z. Bardhi. Jam i gatshëm me z. Alibeaj dhe të gjithë deputetët etj të Fierit të dalim në bazë. Baza me zor e pret. Madje do ia lija vendin tim si drejtues qarku, vetëm të vinte”, u shpreh drejtuesi i Fierit, Luan Baçi.