Një anije transportuese mallrash me shumicë, e quajtur “Aroyat”, u sulmua më 27 shtator, ndërsa po i afrohej portit të Novorossiysk-ut, në Rusi. Një listë zyrtare e viktimave nuk është publikuar; megjithatë, një marinar shqiptaro-turk dyshohet se është i zhdukur.

Bëhet fjalë për Erkan Nikën, inxhinierin e dytë në bordin e anijes turke “Aroyat”, e cila thuhet se u sulmua në Detin e Zi.

Nika, me origjinë shqiptare, nuk ishte mes anëtarëve të ekuipazhit të shpëtuar dhe po kërkohet nga familja e tij, e cila ka bërë thirrje për ndihmë.

Anija turke kishte një ekuipazh prej 16 personash: shtatë egjiptianë, gjashtë sirianë, dy turq dhe një turko-shqiptar.

Sulmi shkaktoi dëme të konsiderueshme dhe një zjarr shpërtheu në pjesën e pasme të anijes, ndërsa pretendimet se sulmi u krye nga forcat ukrainase nuk janë konfirmuar zyrtarisht.

Pas incidentit, nisën përpjekjet për evakuim dhe reagimin fillestar. Megjithatë, emri i inxhinierit të dytë, Erkan Nika, nuk ishte mes anëtarëve të ekuipazhit të shpëtuar. Vëllai i tij, Erizon Nika, ka bërë thirrje për ndihmë në mediat sociale.

“Vëllai im nuk ishte mes ekuipazhit të shpëtuar. Aktualisht nuk kemi asnjë informacion në lidhje me vendndodhjen apo gjendjen e tij shëndetësore. Në kaosin e sulmit, ai mund të jetë në një spital në Rusi ose diku tjetër në terren”, ka deklaruar vëllai i Nikës, i cituar nga mediat turke.

Anija “Aroyat” është një transportuese mallrash me flamurin e Palaut, e ndërtuar në vitin 1997. Anija është në pronësi dhe operohet nga një kompani me seli në Stamboll.

Mediat turke raportojnë se sektori detar dhe autoritetet përkatëse kanë përshpejtuar procedurat e sigurisë. Të afërmit dhe kolegët e Nikës u kanë bërë thirrje organizatave ndërkombëtare detare, ministrive përkatëse dhe qendrave të koordinimit të kërkim-shpëtimit që të mobilizojnë të gjitha burimet në dispozicion.

Incidenti po vlerësohet në kuadër të rregullave SOLAS, ligjit ndërkombëtar detar dhe sigurimit për rrezikun e luftës.