Londër/ Zjarr në Heathrow, mbyllet aeroporti, mbi 1300 fluturime të anuluara! Dyshohet sabotazh rus (VIDEO)

Një zjarr i madh në një termocentral afër aeroportit ka shkaktuar atë që ekspertët tashmë e quajnë "një makth për aviacionin civil", me probleme "katastrofike" që nuk janë parë në këtë përmasë që nga 11 Shtatori ose nga shpërthimi i vullkanit islandez Eyjafjallajökull në vitin 2010.

Aeroporti i Heathrow, më i madhi në Evropë dhe i pesti në botë për nga numri i pasagjerëve, do të qëndrojë i mbyllur të paktën deri të premten më 21 mars, për shkak të zjarrit që shpërtheu natën e kaluar në termocentralin e Hayes, në perëndim të Londrës.

Ky vendim pritet të shkaktojë kaos në transportin ajror në të gjithë botën, jo vetëm në Mbretërinë e Bashkuar, me pasoja që do të ndihen për disa ditë me radhë.

Një zjarr i frikshëm, por ende pa një shkak të qartë

Zjarri, i cili u përhap rreth orës 23:00 të mbrëmjes së kaluar, ka lënë pa energji rreth 16 mijë banesa në zonën përreth. Ekipet e zjarrfikësve në Londër arritën të shuanin flakët pas disa orësh përpjekjesh.

Hetimet janë marrë përsipër nga njësia kundër terrorizmit e Scotland Yard, por autoritetet britanike theksojnë se kjo është një procedurë standarde për incidente të rënda në infrastrukturat kyçe kombëtare. Ata sigurojnë se "të gjitha pistat mbeten të hapura", duke përfshirë mundësinë e një defekti teknik apo gabimi njerëzor. Deri në mbrëmjen e sotme, nuk ka prova që të sugjerojnë ndonjë sabotim nga Rusia apo ndonjë organizatë tjetër armiqësore.

Humbje të mëdha për aviacionin evropian

Ky incident pritet të krijojë probleme serioze për transportin ajror në të gjithë Evropën. Aeroporti i Heathrow shërben 84 milionë pasagjerë në vit, një rekord i arritur në vitin 2024. Në pesë terminalet e tij, një avion ngrihet ose ulet çdo minutë.

Sot, do të anulohen ose devijohen të paktën 1,300 fluturime, duke ndikuar drejtpërdrejt në rreth 250 mijë pasagjerë në mbarë botën.

Pasojat e para:

Fluturime ndërkontinentale që ishin nisur për në Heathrow janë detyruar të kthehen prapa.

Shumë avionë që ishin pranë Londrës janë dërguar në aeroporte të tjera, si Gatwick dhe Stansted, të cilët nuk kanë kapacitet të krahasueshëm me Heathrow.

Disa fluturime janë zhvendosur në vende të tjera, si Irlanda, Franca dhe Gjermania.

Qindra fluturime të tjera do të anulohen.

Eksperti i aviacionit Neil Hansford, nga agjencia Strategic Aviation Solution, i tha gazetës The Guardian se "mbyllja e një aeroporti gjigant si Heathrow për një ditë të tërë është diçka jashtëzakonisht e rrallë. Nuk mbaj mend diçka të tillë që nga 11 Shtatori 2001, kur Shtetet e Bashkuara mbyllën hapësirën e tyre ajrore".

Problemet nuk lidhen vetëm me fluturimet e anuluara ose të devijuara. Ka shqetësime të mëdha edhe për mungesën e stafit për të përballuar emergjencën në aeroportet e tjera dhe për furnizimin me karburant të fluturimeve shtesë. "Është një katastrofë për transportin ajror", shtoi Hansford.

Zona e zjarrit mbetet e bllokuar

Për shkak të zjarrit, 150 banorë të zonës Hayes janë evakuuar dhe një perimetër sigurie prej 200 metrash është vendosur rreth termocentralit.

Në një deklaratë, Aeroporti i Heathrow u ka bërë thirrje pasagjerëve të mos shkojnë në aeroport.

"Për të garantuar sigurinë e pasagjerëve dhe stafit, Heathrow do të mbetet i mbyllur deri në orën 23:59 të 21 marsit. Do të japim një përditësim tjetër sapo të kemi më shumë informacion për rifillimin e fluturimeve. E dimë që kjo situatë krijon shqetësime për pasagjerët, por po punojmë me të gjitha kapacitetet tona për ta zgjidhur sa më shpejt".

Aeroporti ka bërë të ditur se do të rifillojë disa fluturime që nga mbrëmja e sotme, me synimin që të rikthehet në normalitet të plotë brenda ditës së nesërme.

Xh.D/K.M/Shqiptarja.com

TAG:
• Aeroporti Heathrow
• Londër
• Britani e Madhe
• zjarr