Një ushtarak nga Egjipti, i shpallur në kërkim ndërkombëtar për vrasje me dashje, plagosje e armëmbajtje pa leje, është arrestuar mëngjesin e sotëm në Rinas, në përpjekje për të hyrë në Shqipëri, ku mendonte se do t’i shpëtonte përballjes me drejtësinë. Ai është Mohamed Rageh, 50 vjeç, i shpallur në kërkim ndërkombëtar, ndërsa konsiderohet si një person me rrezikshmëri të lartë shoqërore nga autoritetet egjiptiane. Në 6 nëntor të vitit 2019, Mohamed Rageh ka vrarë me armë zjarri një tjetër egjiptian A. M. në zonë Giza të Egjipt, ku më pas ka marrë automjetin e viktimës dhe është larguar nga vendi i ngjarjes. E shkuara e tij është e paqartë, por në CV-në e tij e përshkruan veten si ekspert në inxhinierinë e komunikimit, por edhe si ushtarak. Mohamed Rageh mori një çmim për lëshimin e raketave Crotale në vitin 1009, element ky i përmendur në edhe në një certifikate vlerësimi për aftësitë e tij ushtarake. Ndërkaq, në deklaratën policisë thuhet se Shërbimet e Policisë Kufitare Rinas e kanë bllokuar egjiptianin Mohamed Rageh në Rinas, gjatë kontrolleve të shtuara dhe verifikimeve të detajuara të dokumenteve të udhëtimit, kryesisht të personave që shfaqin probleme apo dyshime gjatë intervistimit, me qëllim kapjen e personave të shpallur në kërkim, falë edhe shkëmbimit të informacionit me Interpol Tiranën. INTERPOL Tirana, në bashkëpunim me INTERPOL Kajron do të vijojë procedurat për ekstradimin e tij drejt Egjiptit, bazuar në marrëveshjen e ekstradimit ndërmjet Shqipërisë dhe Egjiptit, ratifikuar në vitin 2004.