CDU/CSU sqaron deklaratën e dy deputetëve të këtij grupimi politik gjerman, në lidhje me mundësinë e shtyrjes së datës së zgjedhjeve elektorale të 30 qershorit 2019 në Shqipëri. Sipas grupit të kësaj partie në parlamentin gjerman, shtyrja e zgjedhjeve do të donte ndryshime kushtetuese, që rrjedhimisht lë të kuptohet, se një vendim i tillë, pra shtyrja e zgjedhjeve, do të ishte në shkelje të Kushtetutës së Shqipërisë.
Mark Hauptmann, deputet i parlamentit gjerman, në një deklaratë për mediat, thotë se si grup parlamentar, ata nuk kanë të drejtë të kërkojnë shtyrjen e zgjedhjeve në një shtet të pavarur. "De facto, kjo do të mund të konsiderohej si një kërkesë për të ndryshuar Kushtetutën e Shqipërisë dhe ligjin zgjedhor të vendit", thotë deputeti gjerman.
Ai apelon që qeveri dhe opozitë të ulen në dialog dhe të arrijnë në kompromis për të mirën e stabilitetit të vendit.
“Është e vërtetë se po ndjekim me shumë shqetësim krizën e brendshme në Shqipëri. Për hir të së ardhmes Europiane të Shqipërisë, duhet të zhvillohet dialog midis qeverisë dhe opozitës, si dhe të dyja palët duhet t’i qasen njëra-tjetrës duke qënë të gatshme për kompromis për të mirën e stabilitetit demokratik.
Nuk është e zakonshme për ne të ndërhyjmë në çështjet e brendshme të Shqipërisë. Si grup parlamentar, ne nuk kemi të drejtë të kërkojmë shtyrjen e zgjedhjeve në një shtet të pavarur. De facto, kjo do të mund të konsiderohej si një kërkesë për të ndryshuar Kushtetutën e Shqipërisë dhe ligjin zgjedhor të vendit. Si pasojë do të lindnin pyetje mbi sovranitetin e një shteti të huaj. Stabiliteti demokratik po ashtu përfshin detyrimin për të respektuar rregullat e legjislacionit ndërkombëtar", thuhet në deklaratën e tij zyrtare në emër të grupit parlamentar të CDU/CSU.
Disa ditë më parë në një deklaratë të përbashkët për “Deutsche ëelle”-n, dy deputetët Johann David Ëadephul, nënkryetari i grupit parlamentar të CDU/CSU në Parlamentin Gjerman dhe njëherësh kreu i grupit të punës për Ballkanin Perëndimor si dhe Christian Schmidt, nga CSU, reporter për Shqipërinë në Komisionin e Punëve të Jashtme, shprehën shqetësimin lidhur me situatën në Shqipëri. Në deklaratën e tyre ata u ndalën edhe në mundësinë e shtyrjes së datës së zgjedhjeve vendore.
Kujtojmë se opozita joparlamentare i ka bojkotuar zgjedhjet vendore dhe ka deklaruar se do t'i bllokojë ato. Opozita kërkon rrëzimin e kryeministrit Edi Rama si kusht për nisjen e dialogut dhe krijimin e një qeverie teknike për ta cuar vendin në zgjedhje të parakoshme, parlamentare, që të mbahen bashkë me ato lokalet. Presidenti Ilir Meta ka deklaruar se është i gatshëm të ndryshojë datën e zgjedhjeve duke i shtyrë ato, por 30 qershori është dita e fundit e afatit kushtetues. Nga ana e saj mazhoranca është shprehur e vendosur për të mbajtur zgjedhjet për kryebashkiakët e rinj në 61 bashki më 30 qershor 2019, ndërkohë që kryeministri Edi Rama nuk e ka ndalur apelin për dialog me liderin demokrat Lulzim Basha, deri më tani te refuzuar.