Shpallja e gjyqtarit Ardian Dvorani nga Departamenti Amerikan i Shtetit si një nga 12 personalitetet më të spikatur në botë në luftën kundër korrupsionit, vijon të prodhojë reagime dhe polemika në Tiranë. Ditën e djeshme Ilir Meta e cilësoi si ‘mafie ndërkombëtare’ vlerësimin e Dvoranit nga DASH, ndërsa sot e krahasoi Dvoranin me fletët e lavdërimit të Partisë së Punës. Nga ana tjetër, aleati i tij, Sali Berisha, ka hedhur në sulm dhëndrin Jamarbër Malltezin, i cili shpërtheu në ofendime ndaj gjyqtarit dhe DASH. Po cilat janë aktet e Ardian Dvoranit në luftën kundër korrupsionit dhe krimit, për të cilat u vlerësuar nga Departamenti Amerikan i Shtetit?! Veprimtaria e Dvoranit si gjyqtar përkon me detyrën e anëtarit të Gjykatës së Lartë nga data 17 shkurt 2005 deri në 11 qershor 2020, ku u shkarkua nga Këshilli i Lartë Gjyqësor, përmes një vendimmarrje të dyshimtë dhe me kërkesë të Ilir Metës.