Report Tv zbardh detaje të reja nga atentati mbrëmë në aksin Elbasan-Peqin ku u vra 26-vjeçari Andi Zylyfi, ndërsa shoku i tij Ardit Uruçi mbeti i plagosur rëndë. Deri tani janë shoqëruar disa persona, një pjesë e të cilëve dëshmitarë që mund të kenë informacion për autorët.
Ndërkohë që po shikohen edhe kamerat e sigurisë në bizneset pranë rrugës kryesore ku iu bë atentati dy të rinjve për të shkuar në identifikimin e autorëve. Autorët duket se kanë pasur informacion të saktë dhe vrasja ka qenë e planifikuar, pasi Zylyfi kishte vetëm 3 ditë që ishte kthyer nga Holanda. Në datë 10 dhjetor ai ishte kthyer në Elbasan, ndërsa tre ditë më pas, pra mbrëmë u ekzekutua.
Dy të rinjtë janë pa precedent penal, ndërsa pista e vetme ku po hetohet tani është larja e hesapeve, lidhur me ngjarjen e një viti më parë ku Zylyfit iu ekzekutua djali i hallës. Andi Zylyfi është kushëriri i parë(djali i hallës) së Endrit Alibej. Ky i fundit mbeti i vrarë në një atentat me armë rreth një vit më parë. Në këtë atentat u vra edhe Arben Dylgjeri 56 vjeç, si dhe një shtetas turk i quajtur Erdal Duranay.
Fakti që Endrit Alibej u vra sapo ishte kthyer vjet nga Holanda dhe e njëjta gjë ndodhi edhe me kushëririn e tij mbrëmë, policia dhe prokuroria po hetojnë në këtë pistë. Autoritetet shqiptare kanë nisur letër porositë për informacion në Holandë në lidhje me Zylyfin nëse ka qenë i skeduar atje. Shkak i ekzekutimit të Endrit Alibejt vjet dyshohet se ka qenë përplasja për pazaret e drogës, por ende vrasjet janë pa autor.