Ish-kryebashkiaku i Nju Jorkut, Eric Adams, është pajisur me shtetësinë shqiptare, së bashku me kartën e identitetit dhe pasaportën, gjatë Samitit të IV të Diasporës Shqiptare që po zhvillohet në Tiranë. Ceremonia është zhvilluar në praninë e kryeministrit Edi Rama, i cili i dorëzoi dokumentet Adams-it, duke e shoqëruar momentin me batuta dhe duke theksuar se një zhvillim i tillë nuk ishte parashikuar më herët. Nga ana e tij, Adams u shpreh se ndihet i lidhur ngushtë me komunitetin shqiptar në Shtetet e Bashkuara, duke vlerësuar shpirtin e diasporës që, sipas tij, mbetet i fortë pavarësisht largësisë nga vendi i origjinës. “E adhuroj të jem amerikan, por sot falë kryeministrit tuaj jam edhe shqiptar,” u shpreh ai gjatë ceremonisë.