Dhuna në protestën e 'Unazës së Re'/ Veliaj: Tirana nuk ndalet, do të triumfojë mbi barbarinë

Kryetari i bashkisë së Tiranës Erion Veliaj ka reaguar pas protestës së banorëve të ‘Unazës së Re’ të mbështetur edhe nga deputetët e opozitës. Veliaj shpreh mirënjohjen për policët e bashkisë për qytetarinë e treguar, sikur thotë ai, përballë partisë së dhunës, hurit dhe zjarrit. Ai u uron shërim të shpejtë 7 efektivëve që u lënduan, ndërsa shprehet i vendosur për vijimin e projektit.

Mirënjohje të thellë policëve bashkiakë për qytetarinë e treguar përballë partisë së dhunës, hurit e zjarrit! Shërim të shpejtë oficerëve të plagosur! Si tek Lodrat, Sheshi Skënderbej dhe Pazari i Ri, puna do e mundë dhunën, dhe qyteti do triumfojë mbi barbarinë! Ta harrojnë, Tirana nuk ndalet më!

Erion Veliaj

Banorët e 'Unazës së Re' protestuan sot sërish përballë bashkisë së Tiranës në ditën e 14 kundër shembjes së banesave të tyre që preken nga projekti i zgjerimit të 'Unazës së Madhe' (Lexo këtu). Situata u tensionua për disa momente dhe banorët sulmuan Bashkinë e Tiranës me tymuese dhe vezë, si dhe qëlluan gazetarët teksa tentuan të hyjnë me forcë në Bashkinë e Tiranës.

Gjithashtu, në drejtim të efektivëve të policisë bashkiake të cilët kishin krijuar kordonin e sigurisë u hodh edhe një bombë molotov, e cila shpërtheu në flakë te dera e Bashkisë, duke lënduar 7 punonjës të policisë bashkiake, të cilët janë transportuar në spital për ndihmën e parë mjekësore. Tre nga efektivët janë goditur me mjete të forta, ndërsa katër të tjerë kanë pësuar djegie nga shashkat.

Për projektin e Unazës së madhe parashikohet që të prishen 317 objekte, 163 prej të cilëve janë në proces legalizimi dhe do të skualifikohen dhe 123 janë me vërtetime pronësie. Por banorët kundërshtojnë vendimin dhe kërkojnë kompensim të plotë, ndërsa bashkia ka ofruar 3 vite bonus qiraje për ata që nuk kanë dokumentacion dhe është shprehur e vendosur për të vijuar projektin.

//Shqiptarja.com

TAG:
• erion veliaj
• protesta e astirit