Jep dorëheqjen zv.ministri i Arsimit Taulant Muka, letër Ramës: S’pajtohem me modelin e punës në MASR

TIRANË- Ka dhënë dorëheqjen mesditën e kësaj të enjteje, zëvendës ministri i Arsimit, i emëruar 2 javë më parë, Taulant Muka. Report Tv dhe Shqiptarja.com kanë siguruar dorëheqjen që Muka i ka dorëzuar kryeministrit Edi Rama, ku thotë se për arsye etike, morale dhe profesionale, largohet nga ky post ministror. Muka falënderon Ramën për besimin e dhënë dhe thotë se kjo dorëheqje është e parevokueshme. Shqiptarja.com kontaktoi me Taulant Mukën, por ish-zëvendës ministri nuk pranoi të japë hollësi lidhur me arsyet për të cilat vendosi të japë dorëheqjen.

“I nderuar z. Kryeministër,

Për arsye etike, morale dhe profesionale, dhe të papajtueshmërisë që unë kam në modelin e punës të aplikuar në Ministrinë e Arsimit, Sportit dhe Rinisë, ju paraqes dorëheqjen time të parevokueshme nga posti i zëvendës ministrit të Arsimit, Sportit dhe Rinisë”-thuhet në letrën e Mukës.

 

Si u emërua Taulant Muka

Mjeku Taulant Muka, u emërua si zëvendës ministër Arsimi, pasi denoncoi për plagjiaturë ish-zëvendësministrin e Arsimit, Ervin Demo. Pas denoncimit të Mukës, ministria e Arsimit verifikoi rastin dhe 19 tetor Demo dha dorëheqjen.

Më 31 tetor, ai i zuri vendin Demos në postin e tij në MASR. Pak ditë më parë, Muka reagoi edhe për arrestimin e pedagogut të Ekonomikut, Dritan Shoraj që u prangos pas dënimit për trafik droge në Itali. Muka tha se ky ishte një turp për auditoret shqiptare dhe se do të bëhej një verifikim i plotë për këtë situatë.