Politikë

Intimidimet dhe dhuna ndaj gazetarëve nuk kanë vend në demokraci, tha ambasadori i BE në Shqipëri Silvio Gonzato. Gjatë një takimi me gazetarët, ai theksoi se vendet që nuk kanë liri të fjalës, nuk janë gati për në BE.

Kreu i PD, Lulzim Basha, në një konferencë për mediat përsëriti akuzat se mazhoranca ka një plan diabolik për të kapur SPAK-un. Kryedemokrati e quajti shashkë për të hequr vëmendjen ngritjen e komisionit të Posaçëm të Dezinformimit. Ai tha se nëse amnistia futet nesër në seancë për votim, do japë votën nëse plotësohen dy kushtet e PD.

Zëvendës-presidentja e Bullgarisë Iliana Lotova në një deklaratë nga Kukësi tha se Shqipëria ka bërë hapa pozitiv drejt anëtarësimit në BE.

Në inaugurimin e Qendrës së re të Inovacionit të Sigurisë dhe Mbrojtjes Kryeministri Rama, premtoi rritje pagash ndërsa tha se në investimet e privatit në ushtri, shteti do të jetë aksioner. Ai shpalosi ambicien se brenda 2030 ushtria shqiptare duhet  të përdorë pajisje të krijuara vetë ndërsa vendi synon edhe eksportet ushtarake. 

Tedi Dobi do të jetë zëvendendës ministri i ri i Drejtësisë

Kryeparlamentarja Lindita Nikolla i ka dërguar një letër zyrtarit të Departamentit Amerikan të Shtetit, James Rubin për t’i kërkuar ndihmë në lidhje me ngritjen e Komisionit Parlamentar të Dezinformimit.

Jo pak, por më shumë se 20 mijë qytetarë, për arsye të ndryshme, mosha, sëmundjet, etj, nuk kanë mundësi të shkojnë në Qendrat e Votimit për të hedhur votën e tyre. Kryetari i KQZ Ilirjan Celibashi, në një takim me OSBE u kërkon palëve të marrin masa ligjore për tu mundësuar atyre të drejtën e votës

Pas disa muajsh, amnistia penale po shkon drejt zgjidhjes së ngërçit në parlament. Demokratët e Rithemelimit përmes Gazment Bardhit premtuan votën pro, duke shtuar disa amendamente, që vetëm disa minuta më vonë u përshëndetën nga ministri i Drejtësisë Ulsi Manja. 

NATO feston këtë vit 75 vjetorin e themelimit. E krijuar më 4 prill 1949 Aleanca më e madhe politike dhe ushtarake e vendeve nga Evropa dhe Amerika e Veriut shënon kështu 75 vite mbrojtje kolektive.