Reshjet e shiut kanë shkaktuar probleme në disa qytete të vendit. Situata paraqitet problematike në Librazhd, Berat dhe Korçë, ku rrugët janë përmbytur duke sjellë vështirësi të qarkullimin e makinave dhe të këmbësorëve.

Në qytetin e Beratit, uji ka shkuar deri në lartësinë e 40 cm, duke sjellë probleme edhe në disa shtëpi. Kanë mjaftuar 60 minuta reshje shiu që qyteti i 'një mbi një dritareve' të notojë në ujë. Me këtë situatë përballen qytetarët e Beratit sa herë që bie shi, por nga ana e autoriteteve nuk është marrë asnjë masë.

Në Librazhd, reshjet e shiut me intesitet të lartë kanë përmbytur rrugën në unazën e qytetit, e ndërsa fusha e sportit është shndërruar në një pishinë, siç shihet në foto që Report Tv sjell. I njëjti problem është shfaqur edhe në Korçë. Pak minuta shi kanë mjaftuar që rrugët dhe trotuaret të vërshojë uji.  Situata paraqitet më problematike në periferi të Korçës.

Rendit zhvillimet sipas orarit:
Ora 20:50
Pas 3 orësh e bllokuar prej rrëshqitjes së gurëve, normalizohet rruga në Murrash (VIDEO)

Pas  rreth tre orësh e bllokuar si pasojë e rënies së gurëve në urën e Murrashit dhe krijimit të trafikut të rënduar, tashmë situata është  normalizuar. Rruga është e hapur në të dyja korsitë. Kjo urë është shumë problematike, ku paraqitet e njëjta panorame sa herë që bie shi. Në rrugë janë të pranishme akoma fadromat që bënë të mundur largimin e gurëve.

Ora 19:27
Rrëshqitje dherash në Librazhd, radhë kilometrike automjetesh (VIDEO)

Prej më shumë se një ore, aksi kombëtar Elbasan-Librazhd është  i bllokuar si pasojë e rrëshqitjeve të dherave. Kjo gjë ka shkaktuar trafik të rënduar. Siç shihet në pamjet që Report Tv sjell radha e automjeteve është kilometrike.

B.K./Shqiptarja.com

Ora 18:39
Librazhd/ Rënie gurësh në urën e Murrashit, bllokohet ambulanca me të sëmurë brenda (VIDEO)

Situata në qytetin e Librazhdit paraqitet shumë problematike. Si pasojë e rënies së gurëve në urën e Murrashit, një ambulancë me të sëmurë brenda ka mbetur e bllokuar.

Report Tv sjell video, ku shihet që rruga është pothuajse e palakueshme. Kjo urë është shumë problematike, ku paraqitet e njëjta panorame sa herë që bie shi.

B.K./Shqiptarja.com

Ora 18:21
Përmbytje dhe në Korçë, uji vërshon në rrugë dhe trotuare (VIDEO)

Pak minuta kane mjaftuar që reshjet me intensitet të lartë të mbushin plot me ujë rrugët dhe trotuaret e qytetit. Sasi më të mëdha të ujit janë rrugët e lagjeve perferike të qytetit.

B.K./Shqiptarja.com

Ora 17:52
'Përmbytet Librazhdi'! Bllokohen automjetet, fusha e sportit shndërrohet në pishinë (VIDEO)

Reshjet e shiut kanë shkaktuar dëme të mëdha edhe në qytetin e Librazhdit. Gazetari i Report Tv, Ronaldo Gjoshi raporton se si pasojë e reshjeve të shiu, janë përmbytur rrugët në unazën e qytetit, e ndërsa lartësia e ujit ka shkuar në disa cm.

Ndërkohë në Murrash ka rënie gurësh.

B.K./Shqiptarja.com

Ora 16:34
'Berati si Venecia'! Përmbytje në qytetin e 'një mbi një dritareve'..makinat 'notojnë' në ujë, dëme në disa shtëpi (VIDEO)

BERAT- Kanë mjaftuar 1 orë reshje me intesitet të lartë që Berati, qyteti i një mbi një dritareve të shndërrohet si Venecia.

Sa herë që bie shi, ky qytet përballet me të njëjtën problematikë, përmbytje. Uji, siç shihet në pamjet që Report Tv sjell, ka vërshuar në rrugë, duke arritur në lartësinë deri në 40 cm, e për pasojë ka sjellë  dëme të shumta në banesat e qytetarëve dhe vështirësi të qarkullimit të qytetarëve e të automjeteve. 

Mësohet se shkak për këtë është bërë bllokimi i kolektorëve të ujërave të bardha dhe ato të zeza të cilat zbrasen në lumin Osum, dhe pavarësisht faktit që problemi është identifikuar, nga ana e autoriteteve përkatëse nuk është marrë asnjë hap për të gjetur një zgjidhje.

B.K./Shqiptarja.com