10-vjetori i Kosovës, Lulzim
Basha: Përulemi para heronjve

Kryetari i PD, Lulzim Basha ka uruar me një mesazh në Facebook 10-vjetorin e pavarësisë së Kosovës. Lideri demokrat shprehet se kjo është një ditë e paharrueshme, ndërsa kujtojmë me përmallim të gjithë ata që u ndanë nga ne me pengun se nuk e panë dot Kosovën të lirë. Mesazhin e tij, Basha e mbyll me besimin se Kosova ka përpara një të ardhme të ndritur europiane.

Statusi i Lulzim Bashës
Gëzuar Pavarësinë, Kosovë! Gëzuar këtë ditë të madhe për të gjithë shqiptarët! Sot, ne jemi të gjithë me mendje dhe me zemër në Kosovë. Përulemi para veprës së Ibrahim Rugovës, Adem Jasharit e mijëra bijave e bijëve të Kosovës dhe mbarë kombit që luftuan e sakrifikuan për këtë ditë të madhe. Sot kujtojmë me përmallim të gjithë të dashurit tanë që u ndanë nga ne me pengun se nuk e panë dot Kosovën të lirë.

Por mbi të gjitha, sot jemi krenarë për Kosovën. Jemi kryelartë para botës dhe kombeve se Kosova ka treguar cdo ditë në këta 10 vjet se pavarësia e saj ishte jo vetëm drejtësi njerëzore dhe historike, por edhe burim për paqen, zhvillimin dhe europianizimin e të gjithë Ballkanit. Jemi plot besim se Kosova ka përpara një të ardhme të ndritur, të përparuar dhe europiane. Sot, ne e dimë se e ardhmja e të gjithë shqiptarëve është e bekuar. Gëzuar Kosovë e shtrenjtë! Gëzuar shqiptarë kudo në botë!

d.b/shqiptarja.com