TIRANË- Nderimi i 4 heronjtë në policinë e shtetit, të vrarë 11 vite më parë ka përplasur kryedemokratin Lulzim Basha me Sekretarin e Përgjithshëm të PS-së, Taulant Ballën. Teksa Basha akuzonte drejtpërdrejtë qeverinë Rama se është e lidhur ngushtë me krimin, e për pasojë nuk janë kapur autorët, e menjëhershme ka qenë reagimi i Ballës. Ai ka akuzuar Bashën autorët e asaj ngjarjeje kriminale kishin lidhje të ngushtë me të në zgjedhjet e 2009.

“Nderim dhe respekt dëshmorëve. Ne nuk harrojmë se dora kriminale e lidhur me LBPD në zgjedhjet e 2009, u mbështet nga “komandanti” policisë që tradhtoi dëshmorët. Ky u gradua&promovua nga Lulezim Basha Ministër i Brendshëm vetëm një muaj më pas. Drejtësia vonon, por s’harron”, shkruan Balla.

Fatos Xhani, Kastriot Feska, Saimir Duçkollari e Altin Dizdari u vranë gjatë një përpjekjeje për ndalimin e shumë të kërkuarit Dritan Dajti. 11 vite pas kësaj ngjarje të rëndë, personi i akuzuar për vrasjen e tyre Dritan Dajti, duke shfrytëzuar boshllëqet ligjore, pas shumë seancash gjyqësore i shpëtoi edhe burgimit të përjetshëm.