Ministrat e njoftuan komisioneren për zhvillimet në zbatimin e reformave dhe përmbushjen e kritereve për secilën nga fushat e udhërrëfyesit për liberalizim të vizave. Kryesisht u prezantuan të arriturat në fushën e riatdhesimit, riintegrimit, menaxhimit të integruar të kufirit, luftimit të krimit të organizuar dhe korrupsionit. U diskutua edhe për migrimin e parregullt dhe sfidat me të cilat po ballafaqohet vendi ynë. Në këtë drejtim u bisedua për punën e përbashkët në javët dhe muajt në vazhdim dhe u rikonfirmua përkushtimi i dyanshëm ndaj këtij procesi të rëndësishëm, thuhet në njoftimin për medie.
Ministrat kërkuan nga komisionerja që të dinamizohet më shumë shkëmbimi mes Kosovës dhe BE-së për të shënuar zhvillimet e arritura dhe të përmbyllet sa më shpejtë procesi me rekomandim pozitiv për liberalizim të vizave për Kosovën, bazuar në përmbushje të kritereve teknike.
Si hap i radhës u tha që gjatë muajit mars do të arrijë një mision i ri ekspertësh të BE-së për të bërë vlerësimin në fushat e mbetura të Udhërrëfyesit për liberalizim të vizave.
Redaksia online
(ac/shqiptarja.com)