KAVAJE- Flakët e zjarrit të cilat përfshinë një natë më parë fabrikën e dyshekëve të Gjergj Krajlit, babait të kryebashkiakut të Kavajës, Redjan Krajli janë shuar mëngjesin e sotëm pas angazhimit të forcave zjarrfikëse Kavajë, Durrës, Tiranë dhe Lushnje.
Flakët kanë shkrumbuar magazinat e dyshekëve në pjesën e vjetër të fabrikës. Ndërkohë kanë nisur hetimet për zbardhjen e shkakut që shkaktoi flakët. Burime për Report Tv bëjnë me dije se për të hetuar këtë ngjarje është ngritur një grup hetimor me hetues nga Prokuroria e Kavajës, Policia e Kavajës dhe ekspertë nga Tirana.
Deri më tani janë pyetur rojet e fabrikës që kanë qenë në detyrë të cilët kanë deklaruar se kanë parë flakët dhe kanë njoftuar menjëherë zjarrfikëset, policinë si dhe eprorët e tyre pa qenë në gjendje të përcaktojnë shkakun e zjarrit.
Kjo është hera e dytë që kjo fabrikë përfshihet nga flakët. Ajo u dogj në tetor të vitit 2009, kur flakët shkrumbuan dy magazinë të mëdha, ndërkohë që në atë kohë ngjarja u përfol si aksidentale.
