2019-a, solidaritet dhe bamirësi, ishte tema e emisionit "Pa Protokoll" me gazetaren Anduela Ndreu, në puntatën e fundit për këtë sezon të parë në televizionin Report Tv.
Për Myftiun e Tiranës, Ylli Gurra, pasojat shkatërruese të tërmetit të 26 nëntorit nuk ishin goditje prej zotit, por prej dorës së njeriut që ka abuzuar me korrupsion në ndërtime të dobëta që i zunë shqiptarët nën rrënoja.
"Kjo nuk është një goditje prej zotit. Kam njohur nga afër familjarët e familjes Lala. Nga binjakët 2 vjecarë, deri tek një nënë, nën rrënoja...Nuk ka asgjë nga zoti, e gjitha ka qenë dhe do të dalë nuk është e vonë, nga korrupsioni, specialistët e thjeshtë që kanë shkuar për të legalizuar, dhe deri tek instancat e larta që janë marrë me ndërtimet, me katrahurën urbanistike në Kënetës, Tiranë, e kudo tjetër...Mosbesimi ose padrejtësia që ne qëllimisht bëjmë, apo sulmojmë apo godasim ndaj njëri-tjetrit. Nuk është se Zoti po hakmerret.
Por ka një realitet tjetër: Më 28 nëntor isha në Shijak, atje ka qindra shtëpi në qytet e fshatra, të prishura, ato janë të ndërtuara në vitet '70, shtëpi një katëshe, ato janë shembur nga lëkundjet natyrore të tërmetit.
Familja Lala, Thumana, kanë pasur shirita që janë vendosur, me 50 mijë lekë të vjetër që kanë marrë inspektorët e thjeshtë që i kanë vënë. Kjo është t'i vrasësh në mes të ditës së diellit.
Jeta njerëzore nuk është kaq e lirë", tha Gurra në emisionin "Pa Protokoll" në Report Tv.
Gurra thotë se sprovë kombëtarë është mirëmenaxhimi i fondeve të mbledhura.
"Nëse ne nuk kalojmë këtë provë kombëtare të mirëbesimit të disa milionave euro që janë dorëzuar në organizmat e shoqërisë civile, institucioneve fetare, edhe ato ën sajtin e qeverisë, nëse nuk do të kalohet prova e mirëmenaxhimit, që janë një amanet, çdo qindarkë që kanë dhënë shqiptarët janë të shenjta", tha Myftiu i Tiranës, i ftuar në Report Tv.
Në momentin e parë pas tërmetit, 200 të prekur, shtëpitë e të cilëve u dëmtuan, u strehuan në manastirin e Shën Vlashit në Durrës. Në një intervistë për "Pa Protokoll", At Grigor Pelushi, thotë se i gjithë komuniteti ortodoks u mobilizua për t'i ardhur në ndihmë shqiptarëve, ndërsa Kryepeshkopi Anastas Janullatos, u bëri thirrje të gjithë shqiptarëve të solidarizohen me njerëzit e lënduar.
Një pjesë e madhe e tyre vazhdon edhe sot të qëndrojë në manastir. Përballë gazetares Anduela Ndreu, At Grigor Pelushi shpjegoi se si u shpërndanë ndihmat.
Rreth 2 ton ushqime u mblodhën nga rinia ortodokse dhe u nisën drejt manastirit pasi nuk ishte i përgatitur për të pritur aq shumë qytetarë. Më tej u ngrit shtab i përgjithshëm, me klerikë, e punonjës të manastirit, ndërsa në total u mblodhën 50 ton ushqime e veshmbathje dhe shuma të konsiderueshme të hollash.
At Grigor Pelushi thotë se ajo që nevojitet në këto momente është "të shihet si është realisht gjendja, të shihet nga afër çdo lloj dëmtimi, të ketë konstatim real të të gjithë të dëmtuarve". Por përgjegjshmëria më e madhe sipas tij, duhet të tregohet tek mirëmenaxhimi i fondeve të mbledhura.
"Të gjithë shqiptarët u solidarizuan në ndihmë të motrave dhe vëllezërve që ishin në vështirësi, por edhe të huajt që ofruan asistencë", tha At Grigor Pelushi duke shtuar se duhet "të mirëmenaxhohen fondet dhe të shkojnë aty ku duhen"
"I lutemi zotit që këta njerëz të kenë banesat e tyre", tha ai, ndërsa nuk la jashtë vëmendjes edhe falenderimin dhe mirënjohjen nga gjithë populli shqiptar për mjekët, policët, zjarrfikësit, emergjencat civile, të gjithë që kontribuuan për të shpëtuar njerëzit nga rrënojat deri duke edhe rrezikuar edhe jetën e tyre.
Gazetari dhe aktivisti i shoqërisë civile, Aulon Kalaja, është një nga personat që është gjendur në moment të parë në Thumanë të Fushë-Krujës në momentin ku ra tërmeti i tmerrshëm i 26 nëntorit me 51 viktima dhe qindra të plagosur. Ai është nga ajo zonë, dhe pasi është interesuar për familjarët e tij në Tiranë, ka marrë rrugën nga kryeqyteti dhe ka ikur në Thumanën ku u rrënuan pallate që morën 22 jetë. Ai kujton ende me trishtim momentin kur gjyshja (Sadete Lala) vdiq nën rrënoja për të shpëtuar nipin e saj të vogël
"Një nënë me mbiemrin Vata që shpëtoi nipin e vetë e kam parë me sytë e mi kanë qenë momente të vështira. Kisha miqtë e mi atje, se jam nga ajo zonë dhe u nisa direkt nga Tirana. Nuk e dinim rrezikun, ne hymë tek dy pallatet, aty kam parë edhe djalin dhe i kemi dhënë një dorë të shpëtojë. Nëna që mbrojti nipin humbi jetën, se e mbuloi me trupin e vet. Kjo tregon dhe forcën e nënave shqiptare", tha Aulon Kalaja i ftuar në "Pa Protokoll" në Report Tv.
Ai hodhi edhe një akuzë kundër qeverisë kur tha se disa ndihma të ardhura nga jashtë Shqipërisë, janë bllokuar. "Na janë bllokuar ndihmat nga jashtë, dhe kanë kaluar tek rezervat e shtetit në Lundër. Do t'i kërkoja publikisht kryeministrit të na lë të punojmë", tha Kalaja. Aktivisti i shoqërisë civile vijon ende të jetë pranë të prekurve nga tërmeti, ku ende shtron dreka dhe ofron ndihma me ushqime e veshmbathje për familjet që ende jetojnë në çadra në zonat që pësuan dëme.
Myftiu i Tiranës, Ylli Gurra e sheh solidaritetin e treguar pas tërmetit të 26 nëntorit, një ringritje të shqiptarëve për t'u bërë bashkë pa dallim fetar a sociale.
"Ky turravrapi i këtyre 30 viteve, kapitalizmi gjysmak...Shqiptarët që në 4 dekada ishin fare pa zotin, të paktën ligjërisht, mesa duket lëkundje të tilla u rikthejnë për disa momente tek Zoti. Besimi i njeriut nuk duhet fuqizuar vetëm në raste katastrofash. Ne zgjohemi më shumë, për të qenë bashkë, dhe jo për të qenë më afër zotit, pasi kjo është personale, ndërsa solidarizimi i të gjithëve bashkë, duke i shkrirë të gjitha nuancat e besimit na kthen tek ajo që realisht zoti që kërkon tek ne. Ne i përkasim njëri-tjetrit, zinxhiri shoqëror. Shqiptarët pas 5 dekadave përballë një tërmeti të tillë u ringritën përballë të gjitha atyre që kanë kaluar", tha Gurra i ftuar në "Pa Protokoll" në Report Tv.
Lajme të tjera
-
Tërmeti shkund Greqinë, epiqendra afër Mitilinit dhe Lesbos! Ja sa ishte forca dhe të dhënat e para nga terreni
27 Tetor, 17:38 -
Tërmet me magnitudë 3.8 në Fier, lëkundjet ndihen në Vlorë, Lushnje e Mallakastër! Ja ku ishte epiqendra
25 Tetor, 19:37 -
VIDEOLAJM/ Tërmeti i fuqishëm ‘shkundi’ Turqinë, spikeren e zë paniku gjatë transmetimit live
16 Tetor, 15:18 -
Tërmeti i fuqishëm shkund Turqinë, ja sa ishte forca dhe ku ishte epiqendra! Nuk ka raportime për viktima (VIDEO)
16 Tetor, 10:48 -
Tërmet 4 ballë godet kufirin Shqipëri-Greqi, ndjehet edhe në Sarandë
1 Tetor, 07:46
-
Tërmeti ‘godet’ El Salvadorin, me magnitudë 6.1! Shikoni pamjet se si lëkunden banesat (VIDEO)
29 Gusht, 09:56 -
Greqi/ Tërmeti godet Rodosin, me magnitudë 4.2 rihter
22 Gusht, 19:00 -
VIDEO/ Tërmeti i fortë shkund Tajvanin dhe lëkund kullat qindrakatëshe! Ja sa ishte forca sizmike dhe epiqendra
16 Gusht, 08:08 -
Tërmet i fortë me magnitudë 7.1 godet Japoninë, paralajmërohet për cunami
8 Gusht, 11:14 -
Tërmet me magnitudë 4.6 ballë në detin Adriatik gjatë natës, lëkundje të forta ndihen në Tiranë e Durrës
24 Korrik, 07:05 -
Ohri goditet nga tërmeti me magnitudë 3.2 Rihter! Lëkundjet u ndien dhe në zonat kufitare të Shqipërisë
8 Korrik, 10:03 -
Ndihen lëkundje tërmeti në Pogradec
7 Korrik, 14:28
