Një ditë pasi emisioni ‘Pa Gjurmë’ në Report Tv zbuloi ngjarjen e rëndë të 22-vjeçares nga Kenia që u gjet në gjendje kritike në trotuarin e pallatit ku banonte, vjen reagimi nga policia e Shtetit. Rreth 3 muaj pas ngjarjes, forcat blu thonë se ishte shoqja e saj që bëri denoncimin më 14 gusht se kishte humbur kontaktet dhe nisën menjëherë hetimet.

Gjithashtu sqarojnë se është regjistruar cështja në Prokurori për veprën penale “Plagosja e rëndë me dashje”. Ditën e djeshme, në emisionin ‘Pa Gjurmë’ foli nëna e vajzës 22-vjeçare duke thënë se e bija punonte në kazino dhe pretendon se e hodhën nga ballkoni.

Ndërsa e bija ndodhet në gjendje kritike, nëna R.A., thotë se vajza u zhduk papritur rreth orës 03:25 deri në orën 07:00 të mëngjesit për t’u gjetur më vonë në trotuar. Ajo punonte në një Apex pranë stadiumit 'Air Albania'.

Pasi u dërgua në spital, mjekët thanë se kishte tre brinjë e kocka të thyera, lëndime në dorë e stomak dhe dëmtime në tru. Nëna e saj R.A, një muaj pas ngjarjes u njoftua nga kompania ku ishte e punësuar e bija dhe që nga momenti që mbërriti nga Kenia spitali është kthyer në shtëpinë e saj.

E bija ndodhet ende në gjendje të rëndë, ndërsa mbahet në jetë përmes aparaturave. Ende e shokuar, ajo shprehej e bindur se dikush tjetër fshihet pas kësaj ngjarje.