Kanë kaluar 23 ditë nga helmimi masiv në lagjen e vjetër të Bulqizës dhe ende banorët vijojnë të mos e konsumojnë ujin nga pika kryesore e shpërndarjes. Uji i cili vjen nga zona D e minierës është ndaluar për t’u konsumuar nga Inspektioriati Shtetëror Shëndetësor në Dibër, pasi ende nuk është evidentuar shkaku i helmimit i më shumë se 140 personave. Sipas Drejtorit të Shëndetit Publik Bulqizë, Flamur Meta, situata tashmë është në dorën e Institutit të Shëndetit Publik në Tiranë, pasi pritet të dalin analizat fiziko-kimike e toksikologjike.
"Lidhur me problemin nuk është mbyllur procesi i grupit të punës, pasi për situatën është ngritur një grup me ekspert përkatës. Meqenëse është një nga faktorët uji i pijshëm ky grup pune do të dale me një raport i cili ende nuk është mbyllur. Me daljen e raportit do të bëhet njoftimi zyrtar për të vepruar më tej në lidhje me ujin. Me pak fjalë ne jemi në zbatim të vendimit të ndërmarrë nga inspektoriati shtetëror shëndetësor Dibër dhe do të jetë prapë inspektoriati. Aktualisht inspektorati ka në fuqi që uji mos të pihet", shprehet Flamur Meta.
Pas helmimit të banorëve të kësaj zone, është ngritur një grup pune me ekspertë. Duke qënë se u dyshua se shkaktar mund të jetë konsumimi i ujit, ky grup do të dalë me nje raport përfundimtar. Më pas do të bëhet njoftimi zyrtar dhe masat që do të ndërmerren.
Më 4 Maj në lagjen e vjetër të Bulqizës u helmuan mbi 140 qytetarë të cilët përfunduan në spital me dhimbje barku,diarre dhe komplikacione të tjera shëndetësore.
Komente
