Një cikël prej 30 veprash i piktorit shqiptar Zhan Tase është ekspozuar në ambjentet e Hollit kryesor të Muzeut Historik Kombëtar. Kjo është ekspozita e parë e piktorit Tase në Shqipëri, pas rikthimit nga emigracioni.

Në këtë ekspozitë me ngjyra të kursyera, por të përcaktuara në mënyrë origjinale, stili piktorik e kapërcen tematikën si pikënisje të tablosë. Figurat shkojnë shumë më përtej asaj që ka dashur të thotë vetë piktori.  

"Tematika e para është  e thjeshtë  dhe janë të gjitha momentet e jetës  së përditshme  të stilizuara, të pikturuara. Kam përshtypjen në një mënyrë  ndryshe. Këto janë të gjitha motive  nga jeta e vendit tim duke filluar që me eksodin para '90 që është edhe një temë e përshtatshme  për kohërat e sotme  dhe që jetojme dita ditës. Pastaj fillojmë momente të ndryshme nga lypja  që shikojm në rrugët e Tiranës", shprehet Tase. 

 Në pikturat e Zhan Tases ngjarjet e aktualitetit i nënshtrohen procesit emocional dhe filozofik si emigracioni, familja, varfëria, dashuria, shkëputja e parë e fëmijës nga gjiri i familjes për të rikrijuar ciklin e metejshëm të jetës, vijnë si një frymëzim i pandërprerë në tablo. Më tej duke u shndërruar në art, figurat e këtyre tablove marrin trajta futuriste, duke ruajtur besnikërisht shprehjet figurative të Zhan Tases. 

"Kjo është një familje e gjitha bashkë  ku tregohet mbështjellja prindërore  duke filluar që nga burri  dhe të themi që nga gruaja  duke mbështjellë fëmijët e tyre. Janë momente nga jeta jonë e përditshme  dhe nuk ka ndonjë filozofi", u shpreh Tase.

Ekspozita e piktorit Zhan Tase në Muzeun Historik Kombëtar do të qëndrojë e çelur deri më 20 qershor. 

Redaksia Online
(M.Ç/shhqiptarja.com)