Kanë mjaftuar vetëm pak orë reshje të dendura shiu për të rikthyer panikun te një pjesë e madhe e shqiptarëve. Disa qytete janë përmbytur gjatë ditës së sotme, për shkak të reshjeve masive që përfshinë vendin. Situata më e frikshme është paraqitur në qytetin e Laçit, ku ka dalë nga shtrati përroi i ‘vdekjes’, i cili tre vjet më parë mori tre jetë njerëzish.

Report Tv siguroi foto dhe video nga vendngjarja, ku përroi që kalon përmes qytetit, ka krijuar një situatë kaotike. Rrugët dhe bizneset janë ‘pushtuar’ nga uji, duke e shndërruar qytetin në një ‘Venecia’ të dytë.

[gallery]25127[/gallery]

VD/Lezhë, shirat përmbytin rrugët e qytetit, uji arrin 20 centimetra
Reshjet e shiut kanë prekur edhe Lezhën, një tjetër qytet i rrezikuar nga përmbytjet. Problemet e para janë shfaqur në Njësinë Administrative të Blinishtit, ndërsa rrezikohet të dalë nga shtrati kanali i ujërave të larta, duke rrezikuar tre fshatra. Lajmi është bërë i ditur nga administratori i Blinishtit, Sokol Luku, i cili ka kërkuar marrjen e masave të menjëhershme.

VD/Shpërthejnë ujërat e zeza në Sarandë,'pushtojnë' bulevardin
Sarandë- Sa herë bie shi, Saranda përballet me një problematikë tejet serioze, vërshimin e ujërave të zeza në bulevard dhe në det. Një situatë e tillë është krijuar edhe ditën e sotme, ku reshjet e dendura të shiut përfshinë për disa orë mbarë vendin. Siç shihet nga videoja e publikuar nga mediat lokale, situata është tepër shqetësuese nga vërshimi i frikshëm i ujërave të zeza në bulevard dhe në det. Ky është një problem tejet shqetësues, pasi rrezikon jo pak jetën e qytetarëve, dhe përsëritet sa herë vendi ‘pushtohet’ nga reshjet e shiut.

VD/Reshjet krijojnë probleme në rrugën Mamurras-Fushë Krujë
Mamurras- Moti i keq me reshje të dendura shiu, përveç përmbytjeve në disa zona, ka shkaktuar edhe problematika në aksin rrugor Mamurras-Fush Krujë. Siç duket edhe nga fotot e siguruara nga Report Tv, mjetet janë bllokuar në nënkalimin e “Adriatikut” duke pritur normalizimin e situatës.

Dalja e përrenjve mbi rrugën nacionale ka sjellë edhe inerte që kanë bllokuar kalimin e lirë të automjeteve. Qytetarë të shqetësuar kanë bërë apel që të ndërhyhet nga autoritetet për të shmangur përmbytjet e rrugës. Ata shprehen se kjo situatë përsëritet sa herë që ka reshje shiu.

d.c./shqiptarja.com