8% e bluzave të bardha me covid, krijuan antitrupa! Në fazën e rihapjes do rriten testimet

Me uljen e rasteve me koronavirus dhe me lehtësimin e masave në Shqipëri do të rritet numri i testeve në popullatë. Ndërkohë, testimi serologjik ka zbuluar se rreth 8% e personelit mjekësor të prekur me COVID-19 kanë krijuar antitrupa. Testimi serologjik është përqendruar te grupet e riskut dhe deri tani janë kryer mbi 1 mijë testime të personelit mjekësor.

“Nga ana tjetër kemi vijuar me testimet e serologjisë për evidentimin e krijimit të antitrupave tek grupet e riskut.  Janë më shumë se 1 mijë personel shëndetësor të cilët kanë kryer analizën serologjike. Rreth 8% e tyre kanë krijuar antitrupa, pra rezultojnë 8% që kanë IGG pozitive”, tha Manastirliu gjatë vizitës në Laboratorin e Virologjisë në Institutin e Shëndetit Publik.

Pas apelimit për më shumë kujdes dhe ndërgjegjësim të qytetarëve me hapjen graduale, ministrja tha se do të ketë një rritje të testimeve në popullatë dhe gjurmimin e rasteve aktive.

"Ne sot jemi në rreth 190 raste aktive, të cilat janë të shpërndara në 4 qarqe kryesore, por nga ana tjetër ajo çfarë nevojitet është vijimi i testimit dhe vijimi i gjurmimit të kontakteve të rrethit të parë, të rrethit të dytë, ashtu siç tashmë edhe në strategjinë e miratuar nga Komiteti i Ekspertëve është përcaktuar dhe është ndjekur. Në fazën e rihapjes, do të intensifikohet testimi për gjurmimin aktiv të rasteve, ndaj edhe janë marrë të gjitha masat për forcimin e kapaciteteve në Laboratorin e Referencës  në ISHP. 11 mijë teste të tjera kanë mbërritur në këtë laborator, çfarë duhet tashmë nga ky moment dhe në vijim është forcimi i kapaciteteve të laboratorit të Institutit të Shëndetit Publik për të vijuar dhe për të pasur testime, për të gjurmuar dhe për të izoluar çdo rast të dyshuar”, tha Ministrja e Shëndetësisë.

/r.k./Shqiptarja.com

TAG:
• ministria e shendetesise
• Ogerta Manastirliu
• Koronavirus
• koronavirusi ne shqiperi