​Dekriminalizimi, Basha: Do ta çojmë
deri në fund për të larguar kriminelët

Kreu i Partisë Demokratike, Lulzim Basha duke marrë shkas nga dorëzimi i mandatit të deputetit nga deputeti i Qarkut të Lezhëspër Partinë Socialiste, Arben Ndoka ka bërë thirrje dhe një herë për miratimin ligjit për dekriminalizimin.

“Megjithëse edhe sot Edi Rama nuk e futi në kalendarin e Kuvendit ligjin për dekriminalizimin, kjo kauzë jetike për vendin nuk ndalet dhe po i jep frytet e veta ende pa ardhur në fuqi. Dorëzimi i mandatit nga i zgjedhuri i Edi Ramës në Lezhë, Arben Ndoka, është rezultat i drejtpërdrejtë i nismës tonë 2-vjeçare të dekriminalizimit”, shprehet Basha.

Lideri i opozitës tha se, Rama është penguesi dhe kundërshtuesi i një ligji të tillë pasi e ka bllokuar disa herë, e vonoi edhe pse  angazhua Parlamenti Evropian me marrëveshjen e 24 dhjetorit.

Pavarësisht kësaj,Basha tha se Dekriminalizimi do të çohet deri në fund duke thënë se ka mbështetjen e ndërkombëtareve dhe qytetarëve.

“Nuk ka për t’u ndalur kjo frymë! Dekriminalizimi do të bëhet për ta çliruar vendin nga trafikantët, rrëmbyesit, vrasësit. Me në krah partnerët tanë të çmuar ndërkombëtarë, bashkë me qytetarët ne do ta çojmë atë deri në fund”, përfundoi Basha.

Redaksia Online
(f.s/shqiptarja.com)