​Inva Mula flet për “Peshkatarët e
Perlave” në Pallatin e Kongreseve

Opera “Peshkatarët e Perlave”, me regjinë dhe pjesëmarrjen e sopranos me famë botërore Inva Mula, do të çel sezonin artistik të Teatrit Kombëtar të Operës dhe Baletit.

Gjatë një konference për mediat, drejtoresha e institucionit Zana Çela paralajmëroi një sezon të pasur artistik.

“Këtë vit ne do ti japim shumë prioritet performancave të Ansamblit Popullorë, pasi ky është viti i 60 vjetorit të Ansamblit të Këngëve dhe Valleve popullore”, tha Çela.

Francez Akoka:Politikanë shqiptarë mbështesni operan
“Peshkatarët e Perlave” të shkruar nga Bizet, Mula e ka kënduar të plotë vetëm në Shqipëri në vitin 1990, me regji të Nikolin Gurakuqit.  

“Siç e shikojmë të gjithë ne, madje duke ndenjur këtu po thosha si ka mundësi që marrim guximin të luajmë në një teatër që nuk është teatër operash, madje nuk është as një teatër i mirëfilltë është një sallë konferencash. Teatri ka nevojë për ballkone për një rrumbullakësi e thellësi skene, megjithatë nëse antikapet do ti kthejmë në favor, e të mendojmë që po bëjmë një show të bukur një spektakël, i cili nuk do të jetë vetëm për melomanët e të dashuruarit e operas klasike, por do të jetë për një publik më të gjerë”, u shpreh Mula.

Inva Mula tregoi  se vepra e Bizet ka shumë vështirësi muzikore dhe për ngjitjen në skenë ka ndihmuar edhe dirigjenti francez Gerard Akoka.

Dirigjenti, që ka qenë në Shqipëri edhe për premierën e ‘90-s, pasi vlerëson artistët e orkestrën, i bëri apel qeverisë shqiptare për rimëkëmbjen e Teatrit të Operës.  

“Inva është nje këngëtare e mrekullueshme, një artiste e njohur botërisht. Dhe për këtë jam shumë i lumtur. Dhe mund t’ ju garantoj se të gjithë këta artistë që janë këtu janë më të mirët. Por unë do doja të kërkoja ndihmën tuaj, zonja dhe zotërinj të shtypit. Të ndërtosh një opera të re është e madhërishme, ta përjetësosh atë është fantastike, por çfarë është një opera, çfarë ka brenda operës. U them politikanëve te Shqipërisë, cili është sensibiliteti i tyre për këtë çështje. Për ta njohur me mirë Shqipërinë jashtë kufijve, është e nevojshme ta promovosh e ta prezantosh sa më mirë, e jo ta eksportosh operën, këngëtarin. P.sh. Inva Mula e Saimir Pirgu janë ambasadorë shumë të mirë të Shqipërisë përtej kufijve.”, thotë Akoka.

“Peshkatarët e Perlave” do të shfaqet më 22 shtator në skenën e Pallatit të Kongreseve. Vepra shoqërohet edhe me pjesë koreografike të drejtuara nga Enada Hoxha dhe Gert Vaso.

Në këtë premierë do të interpretojnë artistë të njohur shqiptarë si baritoni Armando Likaj, sopranoja Ramona Tullumani e më gjerë, por edhe të huaj si Caner Hakin, Atalas Mladenov dhe Hrisimir Damjanov. Shfaqjet do të vijojnë edhe në datat 24 dhe 25 shtator.
 
 Redaksia Online
J.Sh Shqiptarja.com