​Kiliç: Pas formimit të qeverisë
Erdogan viziton Kosovën

Përfaqësuesja diplomatike e Turqisë në Kosovë, Kivilcim Kiliç bëri me dije në mediat e Kosovës se presidenti i Turqisë Rexhep Taip Erdogan pritet të vizitojë vendin pas krijimit të qeverisë re dhe ndërtimit të institucioneve.

Lajmi u publikua gjatë përkujtimit të 1-vjetorit të tentativës së dështuar për grusht shteti nga një fraksion i forcave të armatosura turke në ambasadën e Turqisë në Republikën e Kosovës.

“Në Kosovë është në proces themelimi i Qeverisë. Uroj që Kosova të përparojë në të ardhmen dhe bashkë me miqtë e saj do të ketë pranë edhe Turqinë. Presidenti Thaçi vitin e kaluar ka qenë në Turqi dhe urojmë që në një afat shumë të shkurtër të realizojë një vizitë edhe presidenti Erdogan në Kosovë. Pasi të themelohet qeveria urojmë që kjo vizitë të bëhet shumë shpejt” , ka thënë Kiliç.
 
Rexhep Taip Erdogan dhe Hashim Thaçi janë takuar në vitin 2013 në Prishtinë pas ftesës së bërë nga Thaci në rolin e kryeministrit në atë kohë për të marrë pjesë në përurimin e aeroportit ̏Adem Jashari ̋.

Të dy vendet njihen për raportet e konsoliduara politike.

Në fjalën e saj , ambasadorja Kiliç akuzoi kundërshtarin e regjimit të Erdoganit, Fetullah Gylen si organizatorin e vërtetë të tentativës për përmbysje të qeverisë turke korrikun e kaluar.

Organizata FETO e krijuar dhe e drejtuar nga Gylen ka aktivitet të gjerë në 170 vende të botës duke përfshirë dhe Shqipërinë dhe Kosovën. Presidenti turk i ka kërkuar qeverisë shqiptare mbylljen e shkollave fetare të financuara nga Gylen.

Imami Gylen prej 18 vitesh është vendosur në SHBA dhe është dënuar nga Turqia për veprimtari anti-shtetërore dhe krijime të strukturave paralele në polici, forcat e armatosura dhe institucionet e tjera juridike dhe fetare. Ai i ka mohuar vazhdimisht akuzat si planifikuesi i vetëm i grushtit të shtetit të mbetur në tentativë.

Erdogan ka zgjeruar kompetencat politike pas ndryshimeve në kushtetutë të miratuara në referendumin mbajtur në 16 prill të këtij viti. Ai po shrytëzon të gjitha fuqitë në spastrimin e administatës publike dhe insitucioneve të larta politike, ushtarake etj.

D.V/Shqiptarja.com