​Kryebashkiakja e Sarandës,
Thacit: Jeni si një pemë ulliri

PRISHTINE-Presidenti i Kosovës, Hashim Thaçi, ka pritur sot kryetaren e Bashkisë së Sarandës, Florjana Koka, së bashku me ambasadorin e Shqipërisë, Qemal Minxhozin, si dhe një grup të përfaqësuesve të bizneseve të ndryshme nga Shqipëria.

Nga ana e saj kryetarja e Sarandës i ka dhuruar presidentit Thaçi një pemë ulliri. “Kjo është një bimë fisnike dhe e paqes. Ju përfaqësoni të njëjtat tipare”, ka thënë ajo, duke ia dhuruar presidentit bimën e ullirit.

Nga ana e tij Presidenti e falënderoi kryetaren Koka për mikpritjen e përzemërt dhe tradicionale të turistëve nga Kosova. Mirëpo, Thaçi ka thënë se bashkëpunimi strategjik ndërmjet dy shteteve duhet të jetë më dinamik edhe në fusha të tjera.
 “Shqipëria është partneri ynë i natyrshëm strategjik. Dua të shoh më shumë biznese të Shqipërisë në Kosovë dhe anasjelltas. Na duhet një dinamikë e re në shkëmbimet tregtare”, ka thënë presidenti.

Nga ana tjetër, kryetarja e Bashkisë së Sarandës, Florjana Koka, ka shprehur mirënjohje për qytetarët e Kosovës që edhe këtë vit kanë kaluar pushimet në bregdetin  shqiptar. 
“Duam të forcojmë shkëmbimet ekonomike me Kosovën, prandaj kemi sjellë përfaqësues të bizneseve nga Saranda, të cilët kanë sjellë produktet e tyre me vete”, ka thënë ajo. 
Kryetarja Koka ka thënë se është po ashtu e rëndësishme që nga kjo vizitë të nxiten bizneset nga Kosova që të investojnë në Shqipëri. 
 
(d.b/Shqiptarja.com)