99 vjet nga vrasja e Boletinit, ende
nuk është bërë rivarrimi i eshtrave

Më 23 janar të vitit 1916, u vra atdhetari i shquar, strategu popullor, organizatori e udhëheqësi i lëvizjeve për çlirim e bashkim kombëtar Isa Boletini. I lindur në fshatin Boletin të Mitrovicës, që në moshën 17-vjeçare Boletini mori pjesë si luftëtar dhe u vra pabesisht nga shovinistët malazezë në Podgoricë, së bashku me të bijtë Halili dhe Zahidi, nipërit Jonuz dhe Halit, si dhe tre luftëtarë të tjerë.

Mbetjet mortore të Isa Boletinit dhe të bashkëluftëtarëve të tij, në korrik të vitit 2011 iu dorëzuan Komunës së Mitrovicës. Ato ia dorëzoi imami i kësaj komune, Mulla Asllan Murati, i cili 13 vjet pas rivarrimit nga Podgorica i ruajti në një vend të fshehur.

Me rastin e dorëzimit për herë të parë Murati kishte bërë të ditur vendin se ku i kishte fshehur dhe ruajtur ato. Ai kishte zbuluar se eshtrat ishin varrosur asokohe në oborrin e xhamisë së Haxhi Veselit në Mitrovicë. Pas luftës i kishte rivarrosur në oborrin e shtëpisë së tij.

Kthimin e eshtrave të heroit kombëtar dhe bashkëluftëtarëve të tij më 1998 e kishin iniciuar akademik Pajazit Nushi, ndërkohë që kontribut të çmuar kishin dhënë ish-presidenti Ibrahim Rugova, Latif Berisha, Muhamet Shukriu, Remzi Murati dhe Fetah Hasani.

Për rivarrimin e eshtrave të tij tashmë ekziston një Këshilli Organizativ, i kryesuar nga ministri i FSK-së, Haki Demolli. Pas shumë datave që u folën se do bëhet rivarrimi i tyre, në fund është thënë se kjo do të bëhet më 30 qershor të këtij viti./KosovaPress/