'Votojmë kreun e shtetit sonte, Specialen të enjten!', Kurti ofertë PDK-së: Garantoj 62 deputetë! Pa president nuk mund t’i ndihmojmë ish krerët e UÇK-së në Apel

Kryeministri i Kosovës, Albin Kurti, i ka bërë një ofertë të re PDK-së për zhbllokimin e situatës politike: presidenti të zgjidhet sot, ndërsa të enjten paradite të votohet në lexim të dytë projektligji për ndryshimin e Ligjit për Dhomat e Specializuara. Kurti kërkoi nga PDK që të paktën gjysma e deputetëve të saj të marrin pjesë në seancën për kandidatin për president, Bekim Sejdiu, duke thënë se mund të votojnë edhe kundër tij. Në këmbim, ai garantoi se 62 deputetë do të jenë të enjten në Kuvend për votimin e Speciales.

"Ligji është urgjencë, por presidenti është emergjencë. Presidenti duhet të zgjidhet sot. Ligjin mund ta votojmë duke respektuar afatin 72-orësh. Le ta zgjedhim presidentin sonte dhe publikisht zotohem para jush që paraditen e së enjtes kalon leximi i dytë i projektligjit për Dhomat e Specializuara", tha Kurti.

Kryeministri e paraqiti propozimin si një rrugëdalje nga përplasja mes Vetëvendosjes dhe PDK-së për atë që duhet të votohet e para.

"Nëse vërtet kërkojnë zgjidhje, zgjidhja ekziston. Ajo arrihet përmes takimit, bashkëpunimit, bisedimit, marrëveshjes. Nëse e refuzojnë, nuk po duan zgjidhje, por zgjedhje", deklaroi ai.

Kurti më pas konkretizoi ofertën ndaj PDK-së, duke i kërkuar që të angazhohet publikisht për pjesëmarrjen e të paktën gjysmës së grupit të saj parlamentar në votimin për presidentin.

"Ne po e bëjmë edhe një ofertë shtesë e konkrete. Nëse PDK zotohet publikisht se i siguron së paku gjysmën e votave të deputetëve të tyre për Bekim Sejdiun, meqenëse pjesën tjetër i kemi bashkë me LDK, ne po procedojmë me votimin dhe leximin e tyre. Por kërkojmë nga PDK publikisht që të zotohen para jush se së paku gjysmën e grupit të tyre parlamentar mund të na e sjellin në seancë dhe të votojnë qoftë edhe kundër për Bekim Sejdiun, që s'është i VV-së", tha Kurti.

Ai dha edhe një garanci publike për votimin e ndryshimeve për Specialen të enjten.

"Unë garantoj si kryetar i LVV-së dhe si kryeministër që 62 deputetë do të jenë aty për të votuar projektligjin për Dhomat e Specializuara paraditen e së enjtes."

"Nëse PDK është kundër, i them thuaje këtë me votë. Po u them votoni kundër, veç votoni. Mos bojkotoni Kuvendin, shfrytëzoni të drejtën tuaj kushtetuese", shtoi Kurti.

Kryeministri argumentoi se zgjedhja e presidentit dhe çështja e ish-krerëve të UÇK-së në Hagë nuk duhet të kushtëzojnë njëra-tjetrën. Sipas tij, presidenti duhet zgjidhur sot për të shmangur zgjedhjet e reja, ndërsa beteja për ish-krerët e UÇK-së kërkon një strategji më afatgjatë.

"Çështjen e dënimit të krerëve të UÇK-së në Hagë nuk e kemi ndërlidhur me zhvillimet e brendshme dhe as me çështjen e presidentit. Këto janë tema të ndara, por që i tejkalojnë të gjitha partitë. Janë çështje të interesit të përbashkët kombëtar", tha Kurti.

Ai shprehu bindjen se vendimi ndaj katër ish-krerëve të UÇK-së mund të korrigjohet në Apel, ndërsa kërkoi një strategji shtetërore dhe kombëtare për procesin.

"Për katër të dënuarit në shkallë të parë ne besojmë për korrigjim në Apel, ndërsa në anën tjetër një strategji shtetërore kombëtare për ta fituar këtë betejë", deklaroi ai.

Kurti paralajmëroi se dështimi për zgjedhjen e presidentit do ta çonte Kosovën në zgjedhje të reja dhe do të pengonte, sipas tij, pikërisht angazhimin që kërkohet për procesin në Hagë.

"Nuk mund t'i mohojmë pengesat e menjëhershme që kemi para nesh. Moszgjedhja e presidentit të Kosovës na çon në zgjedhje, por na pamundëson të merremi me strategjinë kombëtare dhe Apelin, që është shumë i ngutshëm", tha Kurti.

Kurti akuzoi gjithashtu PDK-në se Vetëvendosje ka bërë katër hapa drejt kërkesave të saj, ndërsa pala tjetër nuk ka bërë asnjë lëvizje drejt një marrëveshjeje.

"Ne jemi konstruktivë, të përgjegjshëm e bashkëpunues. Kemi bërë katër hapa në realizimin e kërkesave të PDK-së. Projektligjin e votuam në lexim të parë. Ata po i marrin të mirëqena, por do të ishin të pamundura pa Vetëvendosjen. Ne i bëmë katër hapa drejt tyre, PDK asnjë hap drejt nesh. Kjo është e padrejtë dhe e padobishme", tha ai.

Dalja e Kurtit para mediave erdhi pasi ai zhvilloi një takim me kryeparlamentaren Albulena Haxhiu dhe Glauk Konjufcën. Deputetët e partive parlamentare ndodhen në Kuvend, ndërsa përplasja politike mbetet te rendi i votimeve.

PDK kërkon që fillimisht të votohet në lexim të dytë ndryshimi i Ligjit për Dhomat e Specializuara dhe vetëm më pas të vazhdohet me presidentin. Bedri Hamza deklaroi sot se nuk do të zhvillojë takim tjetër me Kurtin pa u votuar më parë ligji.

Ndërkohë, para Kuvendit po zhvillohet për të dytën ditë protesta me kërkesën për votimin përfundimtar të ndryshimeve në Ligjin për Dhomat e Specializuara. Organizatorët kanë paralajmëruar se nuk do të tërhiqen derisa ligji të votohet.

Rendit zhvillimet sipas orarit:

Të Fundit Të Parat