TIRANE - Aleanca KuqeZi ka reaguar ashpër ndaj marrëveshjes për kufirin detar me Greqinë që sipas saj “po ridiskutohet në mënyrë meskine nën urdhrin e Kryeministrit Sali Berisha i cili është marrë peng nga politika helene”.

Aktivistët e AK kanë qenë sot në Sarandë nga ku, me mjete lundruese, janë nisur drejt vijës kufitare detare me Greqinë, përgjatë së cilës kanë vendosur shirita të kuq në formë simbolike kundër “ndryshimit të kufijve nga mafia bardhe-blu e dy vendeve”.

Nën sloganin “Shqipëria nuk është për tu shitur”, Aleanca KuqeZi ka kërkuar nga autoritetet e shtetit shqiptar dhe atij grek që të respektohet vendimi i Gjykatës Kushtetuese të Republikës së Shqipërisë.

“Shqipëria nuk është për t’u shitur dhe Berisha e Samaras të mos tentojnë të prekin kufirin shqiptar pasi ne do të mbrojmë me çdo kusht kufirin e Shqipërisë deri në flijim” ka deklaruar Kryetari i Aleancës KuqeZi, Kreshnik Spahiu, i cili mori pjesë aksion.

“Aleanca KuqeZi vjen këtu në kanalin e Korfuzit për të vendosur kufirin mes Shqipërisë dhe Greqisë në mbështetje të vendimit të Gjykatës Kushtetuese të Republikës së Shqipërisë. Aleanca KuqeZi deklaron se ky është kufiri ndarës në mbështetje të standardeve të së drejtës ndërkombëtare, ky është kufiri që na e kanë lënë të parët tanë, ky është kufiri ku drejtësia shqiptare ka vendosur ndarjen mes dy shteteve”, tha Spahiu.

(im/Shqiptarja.com)