Akademia harton projektin reformues
vihet në pikëpyetje kryetari Beqiraj

Akademia e Shkencave të Shqipërisë nuk gjen qetësi. Zhvillimi me ri vjen nga mbledhja e Asamblesë së kësaj Akademie mbajtur më 31 Tetor. Por vetëm paraditen e të enjtes është bërë publik vendimi për hartimin e një platforme reformuese të këtij institucioni.

Pas deklaratës së kryeministrit Edi Rama për mosdhënien e fondeve, sekretari i akademisë Vasil Tole dhe anëtarët e asamblesë Salvator Bushati, Aurela Anastasi, Artan Fuga, Apollon Baҫe e Beqir Meta janë vënë të garë për të shpalosur idetë reformuese.

“Në vijim të dialogut me Kryeministrin e Shqipërisë, Edi Rama, Asambleja i është drejtuar dje me një ftesë zyrtare për takim për zhvillimin e një debati konstruktiv, i parë si një lloj modeli bashkëqeverisës me shkencëtarët në këtë fazë përmbyllëse të reformës. Akademia ka shprehur angazhimin e plotë dhe ka bërë ekspertizën për kryerjen e Reformës Institucionale të Kërkimit Shkencor në vend, dhe si pjesë e saj edhe për reformimin e Akademisë.”, tha Vaso Tole.

Ndërsa premtohet reformimi i kupolës së shkencës shqiptare, anëtarët e ansamblesë e lënë ende të paqartë çështjen e kryetarit të zgjedhur nga vetë ata.

“Nuk ka asnjë përgjigje. Sikurse ju e dini kryetari i Akademisë të Shkencave është zgjedhur në datën 4 shtator të këtij viti dhe Asambleja e Akademisë së Shkencave në mbledhjen e datës 31 tetor vendosi t’i kërkojë Presidentit një përgjigje në lidhje me shkresën që ka nisur në këtë kuadër.”, u shpreh akademikja Aurela Anastasi.

Por a parashikon projekt-drafti i reformimit edhe rizgjedhjen e kryetarit.

“Por do t’i shikojmë të gjitha mundësitë, edhe rrotacionin në këtë kuadër, me qëllim që të realizohet zgjedhja e përshtashme dhe ajo që është më premtuesja për ta çuar përpara reformën e Akademisë së Shkencave.”, tha Anastasi.

Ndërsa më 16 nëntor pritet të miratohet projekt-propozimi për reformën, akademikët shprehen se gjenden para një problemi të madh, që është ruajtja e institucionit. Ende nuk dihet përmbajtja e projektit për reformën në Akademinë e Shkencave.

Redaksia Online
J.Sh Shqiptarja.com

TAG:
• akademia e shkencave