Një aksident me pasojë vdekje ka ndodhur pak minuta më parë në aksin rrugor Fier-Seman, në vendin e quajtur Fermë-Çlirim.

Sipas burimeve paraprake një automjet është përplasur me një biçikletë dhe si pasojë e përplasjes së fortë, drejtuesi i biçikletës, Behar Xhemali rreth 65 vjeç, ka humbur jetën, ndërsa automjeti ka përfunduar në kanalin anësor të rrugës.

Drejtuesi 31-vjeçar i automjetit, Arenc Kostandini, është shoqëruar në komisariatin e Policisë. Në vendngjarje kanë mbërritur menjëherë tre ambulanca, shërbimet e policisë dhe grupi hetimor për të përcaktuar shkaqet e këtij aksidenti me pasoja fatale.

Njoftimi i Policisë:

Fier/ Informacion paraprak-Rreth orës 17:10, në aksin rrugor "Fier-Seman", shtetasi A. K., 31 vjeç, duke drejtuar automjetin është përfshirë në një aksident rrugor me biçiklistin, shtetasin B. Xh., rreth 65 vjeç. 

Si pasojë e aksidentit ka ndërruar jetë në vendngjarje shtetasi B. Xh. 

Shërbimet e Policisë kanë shoqëruar në ambjentet e Komisariatit shtetasin A. K., për veprime të mëtejshme. 

Grupi hetimor ndodhet në vendngjarje dhe po punon për sqarimin e plotë të rrethanave të aksidentit.