Aksidenti me dy viktima në Maminas
detaje të reja për vajzën dhe autorin

Mbeten ende mister shkaqet e aksidentit në Maminas, ku humbi jetën Elena Avdillari dhe Bujar Agalliu. Për të mësuar arsyen e aksidentit të rëndë, uniformat blu janë vënë prej dy ditësh në ndjekje të Fatjon Zhaborjas, personit që goditi nga pas taksinë me të cilën udhëtonte 23-vjecarja Elena Avdillari. Burime nga Policia e Durrësit thanë për Report TV se Fatjon Zhaborja menjëherë pas aksidentit ka braktisur automjetin Benz.

Në vendin e ngjarjes hetuesit kanë gjetur gjurmë gjaku, ç’ka konfirmon dyshimet se Zhaborja është plagosur dhe mund të ketë nevojë për ndihmë mjekësore. Për këtë arsye policia po mban në kontroll qendrat shëndetësore në vendin ku ndodhi aksidneti, por edhe në Fushë-Krujë, aty ku dyshohet se fshihet personi që shkaktoi dy viktima në aksidentin në Maminas. Automjeti Benz ishte me shpejtësi më shumë se 140km/orë në momentin e përplasjes. Për t’u larguar nga vendi i ngjarjes Fatjon Zhaborja dyshohet se është ndihmuar nga një person tjetër, ende i paidentifikuar nga hetuesit.

Ndërkohë 23-vjecarja Elena Avdillari nuk u lejua të kalonte në pikën kufitare të Durrësi drejt Italisë. 23-vjecarja sipas të dhënave nga sistemi TIMS udhëtonte shpesh nga Durrësi, ndërsa në Shqipëri kthehej me avion nga Rinasi. Autoritetet italiane i kishin dhënë informacion Policisë shqiptare për punë të paligjshme që bënte Elena Avdillari në Itali dhe kjo ka qenë edhe arsyeja pse nuk është lejuar të udhëtojë. Avdillari kishte tentuar të ikte në Itali edhe në ditët e para të janarit, por përsëri nuk është lejuar. Familjarët e Elena Avdillarit mohuan se 23-vjecarja kishte njohje me Fatjon Zhaborjën. Prokuroria në Durrës po heton vdekjen e Bujar Agalliu dhe Elena Avdillari si aksidentale, po nuk përjashtohet pista e një aksidenti të qëllimshëm.

E ndërsa Fatjon Zhaborja është në kërkim, është zbuluar edhe pronari i automjetit vrasës, Dardan Gjeka, 24-vjeç, nga Shkodra i cili nga ana e tij mohon të ketë lidhje me ngjarjen. Gjeka e ka dërguar ne Report Tv aktin noterial të shitjes së "Benzit" te Fatjon Zhaborja në datën 22 janar 2018, por nuk ka ndërruar pronësinë. Pavarësisht se Gjeka rezulton nga sistemi TIMS se ka udhëtuar disa herë jashte në data të ngjashme me Elena Avdillarin, ai ka mohuar se ko njohje me 23-vjecaren.

d.b/shqiptarja.com