SHKODËR- Operacioni për kërkimet e parcelave të kanabisit në zonat e thella të Dukagjinit i kushtuan shumë nënkomisarit Rrok Frroku, 54 vjeç, i cili u rrëzua në humnerë për shkak të terrenit mjaft të thepisur.

Ngjarja u regjistrua ditën e djeshme në mesditë rreth orës 12:00 dhe në ndihmë i kanë shkuar menjëherë forcat blu me disa grupe të RENEA-s dhe me ekipe mjekësore të cilat bënë të mundur nxjerrjen e tij nga humnera në një terren ku mund të ulej helikopteri.

Pas dy tentative të helikopterit shqiptar për të shpëtuar efektivin e policisë të cilat dështuan për shkak të terrenit të thyer është kërkuar ndihma e KFOR. Helikopteri i KFOR bëri të mundur transportimin e tij drejt spitalit të Traumës në Tiranës.  

Nënkomisari Frroku ka tre brinjë dhe njërën këmbë të thyer. Policia njofton se nëse do të jetë e nevojshme efektivi do të dërgohet jashtë shtetit për mjekim më të specializuar.

1653748974_FRROKI.jpg

Rendit zhvillimet sipas orarit:
Ora 15:50
VIDEO/ Momenti i shpëtimit të efektivit të policisë, Helikopteri i KFOR e nxjerr nga humnera efektivin e policisë, 3 brinjë e një këmbë të thyer

Pas disa orësh, një helikopter i KFOR ka bërë të mundur transportimi e efektivit të Policisë, Rrok Frroku nga zona e Dukagjinit drejt spitalit të Traumës në Tiranë. Gazetari i Report TV, Ergys Kavaja, raporton se efektivi ka tre brinjë dhe njërën këmbë të thyer. Pas dy tentative të helikopterin shqiptar për shkak të terrenit të thyer është kërkuar ndihma e KFOR të cilët kanë sjellë një ekip të specializuar për transportimin e efektivit të Policisë.

"Falë ndihmës së KFOR-it u mundësua transportimi me helikopter, drejt Spitalit Ushtarak Tiranë, i oficerit të Policisë, i cili, si pasojë e terrenit shumë të vështirë me një shkallë të lartë rrezikshmërie, në një zonë malore të fshatit Shosh, Dukagjin u rrëzua dhe ra në humnerë, një ditë më parë. Oficeri i Policisë u rrëzua gjatë kontrollit në terren së bashku me grupin e kontrollit, në kuadër të planit të masave për kontrollin e territorit, për goditjen e veprimtarisë kriminale të kultivimit të bimëve narkotike.

Me interesimin e drejtpërdrejtë të Drejtorit të Përgjithshëm të Policisë së Shtetit Gledis Nano, u bë e mundur që një helikopter i KFOR-it në Kosovë, të nisej me urgjencë nga Kosova në drejtim të Dukagjinit. Pavarësisht shkallës së lartë të rrezikshmërisë për ta tërhequr oficerin e plagosur, në helikopter, falë profesionalizmit të ekipit të helikopterit të KFOR-it dhe ndihmës së një grupi special të RENEA-s, u bë e mundur transportimi i oficerit të Policisë nga zona e rrezikshme ku kishte rënë, drejt Spitalit Ushtarak Tiranë.

Oficeri i Policisë i është nënshtruar menjëherë një trajtimi të specializuar mjekësor. Drejtori i Përgjithshëm i Policisë së Shtetit ka kërkuar nga ekipi i Spitalit Ushtarak Tiranë, ofrimin e të gjitha shërbimeve të specializuara, dhe në rast nevoje transportimin e oficerit të Policisë për kurim, jashtë shtetit. Policia e Shtetit falënderon KFOR Kosovën për ndihmën e çmuar dhe gatishmërinë e shprehur duke dërguar menjëherë helikopterin, Shtabin e Përgjithshëm të Forcave të Armatosura të Republikës së Shqipërisë, i cili iu përgjigj gjithashtu menjëherë kërkesës për të vendosur në dispozicion të forcave të Policisë, një helikopter, por për shkak të terrenit mjaft të vështirë nuk mund të bëhej e mundur  tërheqja e oficerit të plagosur nga vendi deri ku kishin mundur ta nxirrnin me krahë shërbimet e Policisë dhe të ekipit të urgjencës mjekësore. Policia e Shtetit falënderon edhe aktorët e tjerë si Ambasada italiane në Tiranë dhe kolegët italianë që shprehën gatishmërinë, për të na ndihmuar për situatën e krijuar", njofton policia.

B.K./Shqiptarja.com